Bei’s Reidlingers isch au widder Weihnachte g’wä. De Bu isch zum erschte Weihnachtsfeierdag widder g’komme. Er wohnt in Bruh’sel, wegge sei’m Job. Oschtere un Weihnachte lasster sich als blicke. Er had ahg’fragt, ob er zum feschtliche Ahlass sei neie Freindin vorstelle dürft. Die däd sich sehr interessiere. Alleiweil hats g’schellt un de Bu mit sei’m Mädel sin ahg’stapft komme. Es war ä Blonde. Abber es sei glei g’sagt, selle Vorurteile un Witzle hän bei ihr ned zu getroffe. Beim Gans esse hat se sich vielleicht äh bissle ahg’stellt, weil se net klar komme isch, mit denne Brocke. Sie konnt sich abber symphatisch unnerhalde, isch ä Mädle vom Kraichgau un war wohl sehr glücklich, dass de Bu ihr mol sei Eltre vorg’stellt hat. Ma hat als des G’fiehl g’hätt, sie hätt gern des „Du“ ahgebote gekriegt. Demm war aber jetztat net so. So schnell geht’s ja au widder net.! Abber von de Anekdote, die de Vadder oder die Mudder ibber de Bu verzählt hän, war se ganz seelig un hat viel g’lacht. Sie sin geblibbe bis um zehne am Owed un es war än scheene erschte Weihnachtsfeierdag g’wäse. De Chrischtbaum un de Schmuck in de Wohnung hän au gut gebasst, un des Mädle vom Kraichgau hat beim Abschied g’sagt, sie hätt sich so wohl g’fiehlt im Elternhaus vom Bu ,un es wär so ä herzliche Atmosphär g’wese un sie däd sich freue uf ä nägschtes Mol. Un de Bu hat g’sagt, es wär jetzat echt gut g’wäse, dass die Eltre un sei Zukünftige uf die Weihnacht z’sammekomme sin. Wie se dann abg’fahre sin, isch d‘Mudder an ihr Nähtischle g’gange. Un wie se z’rick gekomme isch, hat de Vadder g’fragt: „ Un?!“ D‘Mudder hat als Antwort gäbbe: „Zwäue zwanzig“ „Zwäue zwanzig?“ Hat de Vadder uhgläubig wiederholt. „So viel scho?“ Un d’Mudder hat g’sagt. „So isch’s. Ich häb mei Strichlischt präzis g’fiehrt. Es war jetzt des Mädle von heit die zwäu un zwanzigschte, die de Bu uns als sei Zukünftige vorg’stellt hat. Ä Schnapszahl.“