Hallo Mariele,
jetz hasches awwer gschafft dass den Siwener vorne weg hasch un den Gmietlichere mit dem Toleranzbeichle sehe derfsch un des jetz zeh Johr lang des isch schun ebbes Wichtichs glaab mers obwohl mer glaawe kennt dass mer sich a an den Achder gwehnd ich wais des un mit dem feiere wirds jo ah immer schlimmer weil mer halt doch nemme so alles mache koh was mer gern mache däht un du hosch des jo ah richtich gmacht mit deinere Feier dassze im Oxe machsch ich heb mer do schon mol mei Gedange gmacht driwwer weile jo a grad e baarmol so debei war iwwerleg mol wehnd eiladsch un wie des isch bei dehne ob die Lagdose vertrage kenne oder obse Schweines no esse oder vielleicht a koi Rind meh un a meglicherweis koi Lewerworschd awer fileicht doch no graicherte Fisch un jetz kumme no die Gurge un Domahde dezu mit ihrene Bazille ich moin Kafiar oder Auschdere henn jo viele seidher schun net gwellt awer inzwische isch alles no ärger worre do sottmer grad end Eiladung neischreiwe horched her iwwerleged eich emol was der gern esse dähded un bringets eich mit Tellere und Bschdegg hemmer gnung mit em Kaffe isches ah nemme so oifach jetz weils do so viele Sorte gebt un mer koh jo net e Badwann voller Käbsele kaafe dass jeder des raussuche koh was er gern hedd und am Schluß hosch a noch lauder zwenig richtiche kaaft also des mitem Biffeh em Oxe isch goldrichdich un jeder koh so duh als ob er gsund wär oder manche duhn a liewer krank weils inderesander isch un am End sin alle zfriede ich jo sowiso weil e net wegerem Biffeh kumm sundern wege dir un deim Gebortsdag oder aigendlich net grad wegerem Gebortsdag ich mecht de jo ah als ohne Gebortsdag bsuche weil sunsch gehts jo schun e Bißle lang bis dranoh un wer wais wie lang des no gehe duhd obwohl mir henn jo schun viel iwwerschdanne erschdemol die 1000 Johr un dann noch mol so oiner mit gfiehlte 1300 Johr un dann immer dezwische isch mol de Wald gschdorwe und die Rindersaich war ah awwer die wär fer uns jetz nemme schlimm weil die fufzeh Johr braucht bis se kommt awwer Vogelgripp un Hienerpeschd vun de Maulunklauesaich schwätze mer schun garnemmeh awwer umso meh vun Zegge un Schachbrettmigge  do kummt wahrscheinz a die Regewaldabholzerei her wenn se fer die dauernde Horrormeldunge soviel Holz ferd Zeidunge brauche un des Zeig isch doch awwer alles soweit fort un trotzdem rege mer sich alle so driwer uff wegem Futschikraftwerk isch des jo klar awwer vum Zeidunge volldrugge werds ah net besser un Wetter hemmer zum Beischbiel ah noch trotz dem Kachelmann un den hat jo jetz de DSK oder wie er noch haist Dominique Gaston André Strauss-Kahn no getoppt ich ward jetz blos druf bis die Idaljener ihrne Belustkonny mol uf Dienschdrais noch Amerika schigge was sich do dann duhd bei de Angela hat jo do net soviel bassiere derfe hegschdens dass de Joachim Sauer worre oder bliewe isch wie se den Obama so ohgschmacht hat iwrigens inderessander isch aigendlich dassze ihren Dogder iwwer e atomfisigalisches Temah gmacht hat mer sodz als net glaawe jetz binne awwer abgrutschd ind Bolidig woe garnet heb hiewelle weil aigendlich hewe jo schun e Gedichtle dichte welle awwer des hat net so richtisch klabbt do hewwe immer widder dro rumgännert un am Schluß wars ebbes ganz anneres als am Afang grad so wie e do vorhin vum Gebordsdag in die Bolidig neigrohde bin debei kennt mer grad ehwe so schee iwwers Wedder redde oder die Erderwärmung oder die Zehozweigschicht awwer Wedder griege mer sowiso und des annere wird schun gnung braidgedrede iwwer Fußball wär jetz noch en Haufe zu berichde weil des so e volkswertschaftlich mordsmäßig bedeitendes Tehma isch aber gozeidank verstehe do nix devun un drum losses a oifach bleiwe un hehr mit meinere Epischdel fer heit uf
un e annermol schreiweder meglicherweis mol mehner

Fihl Griehs
vun mir

OA0611