Wumeeglich pfingschdlich riwwergweht…

I.
Wumeeglich pfingschdlich riwwergweht  un in mei Richdung buggsiert worre isch in de ledschde Däg (durch unser eldeschds Blog-Mitglied un eifrichschde Schreiwer  Otto Arnold) e Buch  vun’eme Karlsruher KIT- Hischdoriker (= Rolf-Ulrich Kunze, dess isch de Bruder vum Liedermacher Heinz Rudolf Kunze, wu viel vun Eich sicher kenne ) mi’m Titl: „Das halbe Jahrhundert meiner Eltern“.  Un in demm Dail, wu d‘ Autore un Autorinne als „Dankschee“ sage an all, wu’ene dodezu verholfe henn, do ka’ma e Zidat vum Schriftschdeller Walter Kempowski  finne, mit demm’er wahrscheins `s Folgende riwwerbringe will:

Mer sollde unsere Alde zuhorche , sie ernscht nemme un’ene net  `s Wort abschneide odda  `ne iwwa de Schnawwl fahre  odda  sogar `s Schwätze verbiede, wann si uns ebbes vazehle wolle
Un mer derfe all dess, was si mol uffgschriwwe  , feschtghalde un uffghoowe  henn, net oifach zum Aldbabier schmeiße, in koi Milltonn, a  net fachgerecht entsorge (dann: wemm odda was werre mer domit gerecht ?) un erscht recht net bei Ebay odda  „Bares für Rares“ verschachere…
…weil dess jo alles uns moant…
Die gsammlde Erfahrunge vun ganze Generazione kennde ma doch net oifach iwwageh un ei’schdampfe…dess wär e Verschwendung, wu’mer uns net laischde kennde
Mer sollde uns schun bigge un dess  uffheewe, was noch uffghoowe werre solld…
…`s wär schließlich unser eigeni  Gschicht !

II.
Noch’m Pfingschdmondag-Gwidder
em Schelle-Engel geglaabt
`s Klee-Buch* en d‘ Hand gnumme
un drin glese:
„…und ohne Sehnsüchte
kann ich nicht lang noch kurz leben.“
Mer iwwalegt , ob der Mann
heitzudag en Leewenskinschdler wär…

Ihn gfroogt: Du, Paul Klee,
was isch jetzt mit de Sehnsucht
un was mit uns heit in de Corona-Pandemie ?
Un i moan , er hedd gsagt,
mer solle die Bloog doch oifach als Mudder vun sellere  bedrachde…(?)

Zwai Pfingschdbotschafde ?
Jetzt losst me halt doch in demm Glaawe !

* Boris Friedewald: Die Engel von Paul Klee, Dumont-Verlag, S. 29