Wünsche derf mer

 Neijohr an de Uferpromenade vom Tegernsee. D’Sonn noch e bissle blässlich, awwer d’Luft wunnerbar frisch un klar. Von de viel dischbudierte Silveschderfeuerwerksfeinstaubbelaschdung isch nix üwwerich gebliebe. Viel Lärm um nix odder de Lärm ums Gebatsch war mee wies Gebatsch selwer. Un die viele Hundlen uff de Promenade (in dere illuschtre Gegend naddierlich koine Promenademischunge!) hopfe un schnuppere munter un vergnügt rum un wirke üwwerhaupt net böllertraumadisiert. Isch des au widder rum un alle Diskussione könne bis zum nächschte Johr eigmottet werre.

Heut isch Aufbruchstimmung angsagt un Auslüfte: de Kopf von de feuchtfreeliche Silveschderfeier und hier bei de Scheene un Reiche un bei de ganz schee Reiche wär heut naddierlich s’Auslüfte vom Echthoorpelz angsagt. Des isch awwer inzwische verpönt, weil em Tierwohl net zuträglich. So werre halt nur d’Bogner- Jäcklen ausglüftet.

Ich üwwerhol grad e junge Familie. Die zwoi Döchterlen, so fünf odder sechs Johr alt, stürme vorweg. Vadder un Mudder folge im gsetztere Tempo un de Familiehund troddelt gmütlich hinnerher. D’Erwachsene üwwerlege, wo mer e Rascht mache könnt. Vielleicht do vorne beim Event an de Schiffsanlegestell, moint d’Mudder – do gäbs Schampanjer un Rotwei! „Un was gebts für Kinner?“ kommts von de Jüngschte, die jetzt uffgekratzt um d’Eltere rumhopft. „Do gebts bstimmt Kinnerpunsch“, moint de Vadder. „Kinnerpunsch odder Kinnerwunsch?“ hakt die Kloi noch. „Kinnerpunsch !!“ sagt de Vadder wie aus de Pischtol gschosse, „Kinnerwunsch hawwe mol g’habt – heut nimmee…“ schiebt er noch hinnerher un guggt do debei so wehmütig uff den See naus, dass ich fascht Mitloid mit dem arme Kerle krieg. Statt em Kinnerwunsch isch in seim Gsicht nämlich en ganz annerer Wunsch zu lese: oifach de Familie- SUV widder in des schnittige Porsche- Cabrio von früher eizudausche. Na ja, wünsche derf mer! Scho grad am Neijohrsmorge!