Wu ’d KI noch iwwerfordert isch…un ob ma „Lausische (Mundart-) Zeide entgegegehe (?) …

Alles schwätzt vun de KI: lobt si in de heegschde Teen odder verdammt’si .
Un sie wärd a getescht‘… dodruff noa, ob ihre „Kreativität“ in Sache Tegschde mache Grenze hot un wu si iwwerfordert wär. Am KIT hot ma versucht, dess rauszufinne , hosch neilich in’eme Zeidungsardiggl lese kenne un a die Froog, wie alles weidergeh‘ wärd…
I sag’s jetzt schun, wie d‘ Iwwerbriefung ausg‘falle isch :
De „Textgenerator Chat GPT“ un der vun „Google“ henn alle zwai beim Tegschdschreiwe net d’Uffgaab erfille kenne, wu ma’ne gschdellt ghat hot…un dess hauptsächlich, weil si koin badische Dialekt noagebrocht henn beim Schreiwe ! *
Un i froog eich jetzt all (die wu net grad glicklich sin mit’ere KI) , ob dess net e Schoas‘ isch fa uns Badische Mundartler, so e KI uff ehr’m Vormarsch zu bremse ?
*zugewwe, die Uffgaab war a net grad leicht :
„Bitte schreibe einen Nachruf auf eine Klimaanlage. Auf Badisch und in Alexandriner Versen. Aber ohne das Wort ‚Klimaanlage‘ “ –
Vielleicht , moant, d’Verfasser’n vun dem Artiggl , ded’s a an de viele verschiedene Mundarde , wu em Badische gschwätzt wärre, ligge , dass do schun emol so e KI ens Schleidere kumme ded … ???

Wie d‘ Lidderaade (un annere Kinschdler) manchmol schun ganz frieh schnubbere , was uff demm Gebiet mol uff uns zukumme kennd, zeigt e Dialog-Schdiggl, wu de Eeschdreicher Felix Mitterer in de 70er Johre schun gschriwwe hot…also vor iwwer 50 Johr !
( 1978 isch „Der Sprachtest“ schun als Heerschbiel im Radio kumme… de Inhalt: „Endlich sollen alle deutschsprechenden Menschen auf ein Einheitsdeutsch ohne Dialekt , Jargon oder Slang eingeübt werden. Bevor man sie auf Sprachkurse verteilt, testet ein Sprachcomputer ihr Sprachniveau…“

Fa de Muawe 2003 haww i so’n Schbroochtescht ins Philppsburscherische Kurpälzisch iwwasetzt un en Bauer vun dort (= Eugen Netscher) als Kandidat gnumme, wu iwwerbrieft worre isch un denn dann mit seine ortstibbische Antworde un Reakzijone zu bschreiwe versucht
Frooge wolld‘ i oafangs, ob mer „Lausische ( Mundart-)Zeide befierchde misse …
Un wer sich vun Eich froogt, wer do beim Tescht wemm gwachse isch odder a net, der muss jetzt dess Schdiggl halt lese !

LAUSISCHE (MUNDART-) ZEIDE
C = Computerstimme (monoton, verfremdet)
N= Name des Kandidaten : Bauer Eugen Netscher =„Needscher Eischien“ (cholerisch,verärgert, emotional )

C : IHRE IDENTITÄTSNUMMER
N: Was isch los ?
C: IHRE IDENTITÄTSNUMMER
N: Hej, du, isch hab kee Nummer un isch bin kee Nummer…isch bin da Needscher Eischien un misch kennt jeder do…
C: NICHT VERSTANDEN SPRECHEN SIE DEUTSCH
N: Was soll isch ??? Dess mach isch doch schun die ganz Zeit ! Heersch du nit gut odder was ?
C: NICHT VERSTANDEN SPRECHEN SIE DEUTSCH IHRE IDENTITÄTSNUMMER
N: Häa, jetzt langt’s awwer ! Der Borremml do w i l l misch wahrscheins nit vaschteh…Mensch, isch schwätz doch kee Schineesisch, odder ?
C: NICHT VERSTANDEN SPRECHEN SIE DEUTSCH SIE ERHALTEN EINEN STROMSTOSS
N: Wass ? Brrr…saach emol, was soll’en dess …schbinnsch dann du ???
C: IHRE IDENTITÄTSNUMMER
N: Isch glaab, bei dir hackt’s…so ebbes ! Setzt der Ollwl do misch glei unner Schroom …!
C: IHRE IDENTITÄTSNUMMER
N: Weesch was ? Schdaisch mer da Buggl nuff mit deinere bleede Nummer, isch hab un weeß un bin keeni, baschda ! Isch heeß Eischien Needscher un ferdisch !
C: NICHT VERSTANDEN SPRECHEN SIE DEUTSCH IHRE IDENTITÄTSNUMMER SIE ERHALTEN EINEN STROMSTOSS
N: Nochemool ? Brrr…Fixedunnerwedder, der Dunnerkaidl pärzt misch dadsäschlisch immer weider … !
C: IHRE IDENTITÄTSNUMMER
N: Mensch, gehsch du mir viellaischt uff da Sack !!! Zum allerledschdemol : isch weeß si nit , die bleed Nummer ! Kabbiersch dess irschendwann noch, du…du Hutsimbbl ?
C: KOMMUNIKATIONSDIFFERENZEN
N: Hmm?
C: KOMMUNIKATIONSDIFFERENZEN STÖRUNG
N: Was isch dess ???
C: STÖRUNG SELBSTTÄTIG BEHOBEN IHR NAME
N: Kraizmilljoone nochemool , wie oft dann noch ??? Haww i nit schun zwee mol gsaacht wi isch heeß ?
C: NICHT VERSTANDEN SPRECHEN SIE DEUTSCH IHR NAME SIE ERHALTEN EINEN STROMSTOSS
N: Brrr…Du, jetzat isch awwer Haij hunne…hoisch gut zu: Eischien Needscher, ja? E u g en N e t s c h e r !!!
C: EUGEN NETSCHER
N: Endlisch ! Er hot’s ! … Isch glaab, dir henn d’Mais schun e paar Kaawl aagfresse, hä ?
C: SIE WISSEN WARUM SIE HIER SIND
N: Nee, weeß isch eewe nit … e Sauerei isch dess ! …Hole die misch middl vun de Ärwedd weg…un a noch mit de Bolizei…wu si’mer dann ? Binne misch do uff en Schduhl, leesche mer e paar Kaawl um’s Härn, die Brieder, die schdaawische…un duhn misch dann alleridd vun weidem zwiwwle…da Daiffl soll si hole, die Banggerd, die eelendische … Dess isch doch e abgekaadlt’s Schbiel, wu die do mit’mer draiwe…!!!
C: NICHT VERSTANDEN SIE SIND HIER UM SICH EINEM SPRACHTEST ZU UNTERZIEHEN WARUM BESUCHEN SIE NICHT DEN VORGESCHRIEBENEN SPRACHKURS IN IHREM ORT
N: Isch ? En Schbroochkurs ? Vun weesche… I s c h kann schwätze !
C: NICHT VERSTANDEN
N: Merksch was ? Isch glaab, d u hosch eener needisch, Bärschdl…nit isch!!!

C: NICHT VERSTANDEN SPRECHEN SIE DEUTSCH SIE ERHALTEN EINEN STROMSTOSS
N: Brrr…Dduuu kannsch misch kraizwais…wwweesch dess ???
C: NICHT VERSTANDEN DIE LANDESREGIERUNG HAT MIT BEGINN DES JAHRES GESETZLICH DIE EINFÜHRUNG DER DEUTSCHEN EINHEITSSPRACHE BESCHLOSSEN DIALEKT MUNDART UND UMGANGSSPRACHE SIND FORTAN VERBOTEN
N: Ja un ? Meensch du, dess juckt misch ? Scheißegal isch mir dess ! Isch wärr drotzdem weider so schwätze, wie’mer da Schnawwl gwaggse isch un keen Deit annerschder…glaabt ihr wumeeglisch, eener wie isch babblt noch de Schrift, blooß weil dess so e paar Großkopfische vun eisch so wolle ??? Nit mit mir !!!
Wann’s noch eisch ging, mißt’i wahrscheinlisch a noch mit meinere Berda, meine Viehscher un mit mei’m Bulldogg Hochdeitsch redde, hä ?? Soweit kummt’s noch …
C: NICHT VERSTANDEN SPRECHEN SIE DEUTSCH SIE ERHALTEN EINEN STROMSTOSS
N: Brrr…rrr…rrr die kukumme jetzat jo immer schneller uffenanner..er.. Wwann isch jo keen so’n Hartrischll wär, ded isch jetzt jo ganz schee d‘ Schlärr hengge…
Awwer demm, demm zeisch isch’s mol…Was glaabsch’n du Dreckskäschdl, du iwwerzwärchschs …vor ebbes wie dir hot eener wie isch noch lang keen Mores…Wa’ma’s kennd…ded i di jo an de Grutz packe un duischschiddle un der d’Lafeed boliere, bis nimmi weesch, was hinne un vorne isch…mit deine komische Faggse do… un schdur wie en Panzer bisch noch dezu !!!
C: NICHT VERSTANDEN WIEDERHOLEN SIE DAS WORT DIVERSIFIKATIONSQUOTIENT
N: Phh, grad noch ! Warum ?
C: DAS IST EIN SPRACHTEST WIEDERHOLEN SIE DAS WORT DIVERSIFIKATIONSQUOTIENT
N: Schneggedenzedeesch !

C: NICHT VERSTANDEN WIEDERHOLEN SIE DAS WORT DIVERSIFIKATIONSQUOTIENT
N: Grumbieregrozzisch…
C: NICHT VERSTANDEN
N: Lewwerworschdebrood…
C: NICHT VERSTANDEN SIE ERHALTEN EINEN STROMSTOSS
N: Brrr…rrr… oh hailischer Sankt Florian…jetzt so en Gruuch voll Raddegigglmoscht !
C: NICHT VERSTANDEN WIEDERHOLEN SIE DAS WORT DIVERSIFIKATIONSQUOTIENT
N: (singt abgewandelt den Refrain von „ Wenn bei Capri…“) : Belle, Belle, Belle Marie, schdell’der vor, ma holt misch ab morsche frieh…
C: NICHT VERSTANDEN SIE ERHALTEN EINEN STROMSTOSS
N: (singt wieder ein Philippsburger Lied) „ Uff de Schderneschanzbrick mit de Datschkapp im Gnick un de englische Ledderhoose …“
C: SIE ERHALTEN EINEN STROMSTOSS
N: Brrr…rrr…rrr (singt dann noch ein anderes Lied : „ Hait si’mer widder graizfiddlfiddl, hait isch da A…“
C: SYSTEMFEHLER
N: „…länger wie da Kiddl“…wollt‘ i bloß noch singe, sunscht nix…
C: SYSTEMFEHLER
N: Wu ? Bei dir ? Bei mir isch alles in Ordnung …
C: SYSTEMFEHLER
N: Jo, haww i mer glei gedenggt, dass des neimodische Glumb do en Fehler hot…
C: SYSTEMFEHLER
N: Alles glar…isch mach misch jetzt schnellschdens aus’m Schdaab… Zagg !, d’Gurde sin mol ab ! Hosch’s gsehne, Dreckskäschdl ? …a nix reschts, was’der do hedd…schwupp ! Un nix wie zamme fort…
C: SYSTEMFEHLER
N: Ja, genau, saach isch doch schun die ganz Zeit aa…
C: SYSTEMFEHLER
N: Numme eens noch…den Gunne will isch der noch aaduh, dassd’nit ummesunscht an mi hiegebabbld ghat hosch…
(schreit laut u. langsam): D I V E R S I F I K A T I O N S Q U O T I E N T !!!
C: SYSTEMFEHLER NICHTS VERSTANDEN
N: Jo, isch viellaischt a besser so …Ajau un tschüss !!!

./.