…mit de scheene kunschtvoll gleegde Blumedebbich, em  Pfarrer mit de Monschdranz unner’m „Himmel“, wu vun de Schdifdungsrät‘ gedrage worre isch, de Messdiener, wu devor ’s Weihrauchfass schwenggend rickwärts henn laafe misse die ganz Zeit ? Un gedengge Eich noch die viele annere Messdiener im Ei’satz mit Fahne un Schdandarde debai ? Un d’Aldärlen un Aldare drauß em Freie , abgegrenzt mit viel Buschwerk aus de Naddur , d’gezierde Haiser  un Schdrooße mit Stofffahne aus de owwere Fenschder in blau-weiß un geel-weiß un de bassende gloane Babierfähnlen in de Blumekäschde un de große Blumeschdeck an de Fenschdere un an de  Doorei’gäng newwer Chrischdusfigure un annere Heilichefigure ?

Dess hot alles gseh wärre kenne vun de Leit  in de scheenschde Feschddagsglaijder, de Kinnerschieler  un de Kinndergaadeschweschdere , de Weiße-Sunndagskinner in ehre Gwänder, de Mädlen mit de Kränzlen uff un de Buuwe,“gschnigglt un gebigglt“ un mit der Kerz in de Hand…genauso wie vun de Volksschieler un ihre Lehrer, de Jungmänner un Jungfraue, de Rosekranz-Bruderschaft, em Kerchechor,  de Feierwehr, de Schdadtkapell‘ un em Mussichveroij und alle annere, wu mitgloffe sin…

Schun vun weidem hosch sie heere kenne, wann sie gschbielt un gsunge henn…Lieder wie „Kommet, lobet ohne End, dem hochheil’gen Sakrament…“, „Großer Gott, wir loben dich…“, „Tantum ergo sacramentum…“ , „Deinem Heiland, Deinem Lehrer…“  „Lobe den Herren, den mächtigstem König der Ehren …“  usw.

De Abschluss war dann immer in de Kerch drin mit de Mess. Drauß sin dann schun widder -oft a wegem Wedder- glei vun fleißiche un gschiggde Händ die Aldär‘ abgebaut worre un manche Midder sin do schun grennt, um sich noch e paar Zweiglen zu ergaddere fa dehoam. Die ware jo gweiht un sin dann drinn schräg unner’s Kraiz an de Wand gschdeggt worre un sollde fer alles oder gege alles gut gwest sei …

Irgendwann hot’s so e Art vun Fronleichnamsprozessione nimmeh gewwe. Ma isch nimmeh so weit durch d’Schdrooße gloffe  un hot viel Schdazione gmacht, oimol sogar bloß bis zum Schbortblatz un zurick in d’Kerch..Am Schbortblatz hot e Kerchebänd gschbielt un dann sin modernere Lieder gsunge worre wie „Danke für diesen guten Morgen, Danke für jeden neuen Tag …“ un annere aus „Dschässmesse“ wu ma gekennd hot domols.

Schbeeder hot’s dann ghaiße vun de Junge: „Fron“…. dess isch e Scheiß-Sach gwest frieher fa d’Leit un en „Leichnam“ isch a net grad ebbes zum Feiere…also, was solls ?“

Un noch e bissl schbeeder henn sich d’Umwelt-Schitzer driwwer uffgreegt, dass fa die paar Schdund vun derre Prozession  soviel Bisch un en Haufe Pflanze aus Gärde un vun de Äcker henn g’opfert  wärre un droa glaawe misse, wu net hedd sei misse…

Was macht ma dann ?  Grad heit morge haww i mitgriegt, dass ledschd unner de Kerchgänger am End vun de Mess Pizza-Schachdle verdailt worre sin , die sie mit Erd fille keende un Pflänzlen in’eme Muschder neisetze kennde zum schbeedere Wiederverwende. Die sollde se zum Blatz vor de Kerch bringe un kennde sie dann nooch denne Zeremonije wieder abhole…Also nix do meh mit riesiche Kardons voller Blumebliedeblädder : rode Klatschmohn, blaue Kornblumekepflen, rosa Roseblädder un weiß-geele Margreedlen  usw. ?  Noochhaldichkeit isch gfroogt…

I froog me bloß: was hallt vun allem annere vun Fronleichnam  heit bei de Leit noch nooch… was isch fa’s „Innedrin“ do noch verwertbar ?