Widder mol November

De November bringt uns alle Johr
gequirlte Triebsinn, des isch klor.
An alle Hailiche, Seliche un in e Denkmal Gmaiselde
sollemer uns erinnere un se verehre, ohne dass mer des wellde.

Die Medie bringe do bräsiche Memoare die ganze Zeit,
vun Oiniche, wo hald scheinz sei misse ferd Leit.
I kennt mol versuche, frehlich zu bleiwe,
awwer dann kennt e jetz net weider schreiwe.

Jetz hod uns de Covid nochemol richtich verwischd.
Un i glaab, dass es aa no ned des ledschde Mol isch.
Die Naduhr hod in ihrem ganze Beschdrewe,
dass Tiere un Pflanze iwwerlewe,
so was audomadisches eigfierd,
dass de Zuwax wenicher wird,
un nemme alles iwwerlebd,
wenns zuviel vunnere Sorde gebd.

Fresse un gfressewerre isch ganz vorne draa.
Un Jäger un Beite basse sich aa.
Schun e Weil moint die Naduhr scheints immerhin,
dass zu viel Mensche uf em Globus sin.

Mit viel Geduld, so muss mer sage,
hot se immer widder zugeschlage.
Die Sintflut, die große Wasserblage,
hot de Noah abgeschlage.

Peschd, schbanische Gripp un Malaria
ware dann e annersmol dra.
So richdich hot awwer alles net funkzionierd.
Drum Hot die Naduhr was Neies probierd.

Damit die Mensche sich selwer hasse,
hot se dene ihr Hern umprogrammiere lasse.
Drum gebts jetz blos noch Krieg un Mord,
un des dauerd immerford.

Weils net zum Toperfolg hot gfierd,
hen se die Atombombe kreierd.
Faschd heds geklabbd, des beese Treibe,
dann kennt e heit do nix meh schreiwe.

Noch dene Fehlschläg kannsch verschdeh:
d Nadur sucht jetz en annere Dreh.
Koi grosse Bombe solles sei,
jetz setzt se liewer ihr Kloizeich ei.

Mid so me Wirus kennt des klappe,
dass mir in die Fall neidappe.
Oinich im Kampf misste mir uns verhalde,
un net so e gewaltiches Kaos geschdalde.

Awwer vielleichd isch de Mensch so versaut,
dass es de Nahdur schließlich graut.
Un middem Covid im Gepäck
butzt se jetz die Menschhait weg.

Vielleicht liesd sich die Menschhaid redde,
wenn alle mid meh Vernunfd handle dähde?

OA1121