7. November 2022

Weschdaag

Otto Arnold

Kommentare

Weschdaag

S isch kaum zu glaawe, awwer wohr,
dass ii aa emol son kloine Lauser war.
Do hot mih alles indressierd, wasses gebd,
so hewe immer mid neie Erkenntnisse glebd.
Un weils indressand war, so vieles zu wisse,
hewe alles im Hern abschbaichere misse.
Un um zu sehe, ob de Schbaicher noch duhd,
dauche mol ei in die Hischdorieflut.

Jetzt hewe grad mol Weschdag ghad.
Sowas laafd heit oifach glatt,
Dei Wesch kannsch ind Maschin neiduh,
dann Bulver nei, un de Deckel zu.
Bisses dann gwesche un gschleiderd isch,
hoggsch zum Beischbiel am Kaffeedisch.
Jetzt nemmsch die Wesch aus de Weschmaschin
un dragsch se zu dem Trockner hin.
Mid Schdrom wird nord die Wesch getriggeld,
wenn manche aa des Schdromgeld niggeld.
Nadierlich koh mer des vermeide,
wenn mer wie in alde Zeide
die Wesch hald uf die Leine hängt,
wo Wind des Wasser dann verdrängd.
Soweit isches en Schbauz fer de Schbaicher
Drum willi jetz friehere Zeide erraiche.

In meim Schbaicher isch deiflich was los.
Wo finne doh de Ohfang blos?
Also frieher war alles annerschd im Lewe.
Awwer ah doh mussd mer des Machbare erschdrewe.
Es war annerschd, des ging bei de Heiser schun los.
Washmaschin? War net, awwer wo wesche mer blohs?
Es gab e Weschkich in jedem Haus
mid kald Wasser, un des laafd dorch en Gulli naus.
En große Kessel, zerschd hald mol zum Koche ferd Wesch,
awwer aa fers Schlachtfeschd zum Koche fun de Werschd.
Zum friehe Ohhaize hosch gnung Holz misse holle,
un de Kessel war a mid fufzeh Oimer Wasser no net voll.
Fer e oifacheres Lewe war manchsmol a en Wasserschlauch dra.
E große Wann un e Volksbadwann gabts do nadierlich aa.
Die Wesch hod mer schdampfe misse beim Koche,
mideme fftah-htsch-fftah-htsch–Wesche-schdehsel ging ders ufd Knoche.
Noch em Abkiehle hod mer die Daile auswringe misse,
Wenn was nohnet sauber war, fand mers beschisse.
Dann hot mer die Wesch uf em Wellblech-Weschbrett berschde misse.
Des Weschbrett kenneder vun de Jazzmusik,
Schaffelbord (shuffle-board) haißt dort des Schdick.
Un dann hot mer die Wesch mol Schbiele misse,
Dezu word se in die Wann ins frische Wasser gschmisse.
Dann mussd mer die Wesch e paarmol kald schbiele.
Vor Kelte kondsch koi Hend meh fiehle.
Noch dem ledschde schdarke Wringe
mussd mer se an die Leine bringe.
In de Weschkich war die Wesch arg beengd,
drum ware uf em Dachbode noch Leine noghengd.
Wammer die Wesch dann hochgschunne hot,
war mer reif fer des Veschberbrot.
Die Weschkich war jo aa dem ganze Haus sei Bad,
wos jeder Mieter efders mole needich had.
Bei dere heftiche Benützung war ganz klar,
daß en Waschtag vorzuschreiwe war.

Dir sehnd jetz, aa ohne die Hilf vun dem Bu (!?)
Hatt e Hausfraa viel zu duh.

OA1122

2 Kommentare

  1. Angelika

    …un weil so’n Weschdag sellemols so’n muskelmäßich oaschdrengende Dag fa d’Hausfraa war, hot’s zum Middagesse meischdens dann bloß en Eintopf gewwe, oft schun am Vorowend gekocht un dann uffgwärmt…Linse odder weiße Bohne…odder ?

  2. Petra RieBüh

    Do komme bei mir au Erinnerunge. Bei uns war immer mondags Waschdag und sonndags Butzdag. Damals, wo i klei war, hat mei Mudder allerdings scho e Waschmaschin g’habt. Do ware vorne, also ziemlich weit obbe, so 2 Walze draa, wo die Wäsch zammegepreßt worre isch wie e Brett, un es gab e lange Zang, damit ma die heiße Wäsch, die do rauskomme isch, net aalange mußt. Mir denkt aa noch des Waschbrett un so en Zuber, wo ma die verrotzte Daschedücher mit de Hand auswasche musst. Des hab ich als g’macht, weil i meiner Mama helfe wollt. Iiih! Wie gut, dass es heut Tempos gibt!