Weltmoischderschaftskater

Geschtern beim Stammdisch: de Kalle brütet üwwer ere dampfende Teetass un sieht echt keesig aus. „Was isch los? Hasch de Pfipfes?“ frogt sein Nochber bsorgt „Ach was, ich heb WM – Kater!“ grummelt de Kalle. De Nochber schütteld de Kopf: „Ach komm, geh fort! Des isch doch jetzt scho e Woch her – des musch doch inzwische verdaut hawwe?!“

„Hasch du e Ahnung, wie schwer mir die ganz WM noch im Mage liegt! Erschtens hen mer bei de Vorrundespiele statt Bier Glühwei gsoffe – des halt de stärkschte Mage net lang aus! Dann hen mer die ganz Zeit Adventslieder gegrölt: „Macht hoch die Tür, das Tor macht weit!“ – des hat awwer scheints nur oiner verstanne, un des war de Manuel Neuer. Un die Japaner hens schamlos ausgnutzt! Hinnerher war mei Agathe sauer un hat gmoint, mir seie schuld an dere Misere, weil unser adventlicher Schlachtruf so was von missverständlich gwese sei!“ De Kalle macht erschöpft e Paus un winkt de Eva, dass die nochmol en Kamilletee bringt.

„Dass mirs awwer heut so schlecht geht, des isch meinere Agathe ihr Schuld! Die hat mer nämlich en Adventskalenner gschenkt – en ganz bsonnerer! Hinner jedem Dürle war ein Nationalspieler odder en Funktionär aus Schoklaad. Ja, wie hätt se au wisse könne, dass bevor’d üwwerhaupt e Dürle uffmache derfsch, des ganze Elend scho vorbei isch?!! Ich heb so en jesusmäßige Zorn kriegt, dass ich alle Dürlen uffgrisse heb. Im erschte war naddierlich die Nummer 1, de Manuel Neuer aus Alpemilchschoklaad – der hat noch gut gschmeckt. Awwer, was solle sage? Ich heb se halt alle gfresse in meim Fruscht! Im Dürle mit de Nummer 6 hat sich de Gianni Infantino als Belzeniggel neigmogelt g’hat – naddierlich aus weißer Schoklaad! So weiß wie die weiß Wescht, wo er angeblich immer hat! Den hewwe mit Gwalt nunnergwürgt! Un dann war ich so in Fahrt, dass ich se alle vernascht heb – egal ob Stürmer odder Ersatzspieler.

Awwer de Gipfel war dann des Dürle mit de Nummer 24: de WM- Pokal in goldichem Stanniolbabbier – aus bidderer Blockschoklaad!!! Ha, do frogsch de doch wirklich, weller Depp sich so was hat eifalle lasse?! Do isch doch de Misserfolg scho vorprogrammiert! Ich heb en mit Abscheu verschbachtelt un des Ding liegt mir heut noch so schwer im Mage wie en Pflaschderstoi!

So, jetzt woisch, warums mir so elend geht! Eva, lass des mit dem Kamilletee un bring mer liewer en doppelte Schnaps! Noch schlechter kanns mir nimmee werre!“