Weihnachtswinterschlof

Ich freu me uff Weihnachte, ehrlich! Awwer wieso werd mir diesjohr des Feschd in oim fort madig gmacht? Egal ob’d in die Zeitung odder in de Fernseh neiguggsch, s’isch grad e Elend! Zum Beispiel geschtern in de Satire- Sendung: do hen se de Weihnachtsmann un sein Schlidde mit eme Drohnefangnetz vum Himmel g’holt. Un au wenn des net bassiert wär: er hätts so odder so net durch de Kamin bis zum Crischbaam gschafft, weil der Kerle hoffnungslos üwwergwichtig war.

Un scho sin mer middedrin im Thema. Wann isch oigentlich unser Chrischtkindle so mir nix, dir nix von dem Fettwanscht ersetzt worre un warum? Des zarte Chrischtkindle hätt durch jeden Kamin gebasst – hatts awwer net müsse. Ja, hätts vielleicht sei scheene, weiße Flüggelen versaue solle? Steckt do am End die Schornsteinfegerinnung dehinner? Sen die alle zu mürb, um selwer zu fege un schicke deshalb de Weihnachtsmann durch de Kamin?

Awwer dass der Kerle so wohlgnährt isch, des wunnert me oigentlich. Also ich bin inzwische so verunsichert, dasse gar nimmee woiß, was an Weihnachte noch uff de Deller derf! E Weihnachtsgans geht gar net, so wie die arme Viehcher gmäschtet werre. Awwer was isch jetzt an Würschtlen mit Grumbieresalat so annerscht? Des Butzsäule isch au gmäschtet worre – bloß sieht mer des dem Würschtle net a, dass oins drinsteckt. Statt desse en Karpfe? Hasch mol gsehe, wie dem mit eme Prüggel de Garaus gmacht wird? Ha, wie kannsch en do Weihnachte feiere, mit so ere gebloogte Kreatur uffem Deller?

Ich glaab, ich halt me do liewer an die süße Weihnachtssache. Awwer was muss e in de Zeitung lese? Uffbasse beim Breedlesbacke wege dem Acrylamid – jo net zu resch backe! Jetzt liege halt nur noch leicheblasse Sternlen uffem Deller!

Awwer Weihnachte – des isch doch net nur de Gaumeschmaus! Do gebts doch au noch annere Sache! Do zündsch halt oifach e Kerzle an. Ach ja? Un de Feinstaub?!?! Nemmsch halt en Chrischbaam mit elektrische Kerze! Ja, awwer gugg bloß, dass der au biologisch isch – sonscht schnaufsch die ganze Feierdääg Peschtizide ei!

Gut, dann isch do noch die Sach mit de Gschenklen. De Oinzelhannel lammendiert, d’Leut kaafe net gnug Gschenklen. Die Psychologe warne, für d’Kinner sens viel zu viele. D’Umweltschützer könne nimmee schlofe wege dem Haufe Gschenklesretoure un weils für d’Päcklen em Regewald an de Krage geht. Un wenn am End des ganz Gschenksbabbier verbrennt wird, isch de Kamin widder versaut un s’langt net, wenn de Weihnachtsmann nur oimol im Johr kommt. Oh verhebs!

Ich glaab, ich mach in dem Johr üwwer Weihnachte e Winterschläfle un wach erscht erscht widder uff, wenns rum isch. Rechtzeitig zu de Diskussione üwwer die Feinstaubbelaschdung  durchs Feuerwerk. Na dann, proscht Neijohr!