Vum Disainer

Wo immer uf de Welt ebbes entschdehd
un sich ums ganze Immidsch drehd,
mid Form, Inhald, ewe dem ganze Schdiehl,
hod de Disainer sei Hend em Schbiel.

Im Weltall un beim Globus aa,
war sicher de Disainer drah.
Des seht mer moischdens, sag ich eich,
an dene Fehler in dem Zeich.

Wenn du sehsch, wie manches disaind isch,
dann findsch dus efder ferchderlich.
Ab un zu findsch s aa ned guhd,
wenn e Wefz dich schdeche duhd.

Un aa beim Schnee – sisch net zum glaawe –
Misd mer koi Lawiene hawe.
Wod nohgucksch kannsch bemerke:
de Disainer war do am Werke.

Der wirgde schun seit ewiche Zeide,
drum kansch aa net mitem schdreide.
Wennds iwwerlegsch, jetz kumme zur Sach,
was hod der mid dem homo sapiens gmachd?

Der hod doch en Kerber, der isch so iewel disaind ,
dass er blos aus Fehler gmachd zu sei scheind.
Seid mol ehrlich, mer kanns ned verschdeh,
jeden Dag duhd was anneres weh.

De Disainer hod dezu Meglichkaide gewe,
Die du in deim ganze Lewe
net alle ganz uffbrauchd bringsch,
bevor du iwwer de Jordan schbringsch.

Mid Schmerztabledde un Nasedropfe
kannsch dann widder frehlich hopfe.
Mid Huschdesaft un Abfiehrmiddel nemme,
kannsch de dem Reschd entgegeschdemme

Wie mer in de Praxis siehd,
sin die maischde Leit bemiehd
trotz dem allem dorchzuhalde.
Des sehsch an dene viele Alde.

OA0522