Egal wie arg ich duh mi mühe,

irgendwie Bilanz zu ziehe,

un aus irgendwelche Gründe

ich sortier mei Jugendsünde,

stell i fescht: Huch – ups – heiei –

en Valentin war net debei!

Net mol en Martin war zugege

in mei’m ach so wilde Lebe.

Der, wo ich mein, war bissl schräg

un, wenn i ma’s recht überleg,

hieß der jetzt Kurt oder gar Barrett?

Heilig war der jo scho gar net!

Der, wo mir die Uuschuld g’nomme,

isch aa net aus Öschtreich komme,

sonscht hätt der g’heiße b‘stimmt schlichthin –

wie? Ja, nadürlich Helloween!

Au an en Nikolaus – oh Mann,

ich schwerlich mich erinnere kann. (??)

Un Könige, dazu glei 3,

war’n leider aa net mit dabei.

Was soll i sage – Fehlaazeig!

E Mißverständnis, liebe Leit.

Soll i die feiere, warum?

Die kenn i net, bin doch net dumm! (?)

E Eis im Sommer isch ma heilig,

des lass i gelte mol kurzweilig,

aber die Leit, wo sich so nenne,

duh i gern emol verpenne.

E kalte Sophie war mei Dande

mit alle ihre Anverwandte.

Statt Pankratius, Bonifatius

sagt ma allefalls Eustachius

e bissel was vom Name her.

Des isch für mich aa net so schwer,

der kommt bei mir glei nach em Schiller

un hieß Eustachius Dindemüller.

Ob Fitwin, Erwin, Wendelin,

wenn’s aa net mei Verfloß’ne sin,

so hab i doch in diesem Sinn

nix gege de Karl Valentin;

wobei i, wie ma merkt unschwer

jetzt widder z’rück beim Thema wär.

Isch ma au noch so arg beim Träume,

den Dag kannsch aifach net versäume.

Mit Herzle, Rose, Werbungstand

bringt der ei’m schier um de Verstand!

Kann sei, so manche reiße die

vielleicht aus ihrer Lethargie?!

Uns konntscht aber bei solche Sache

in der Hiesicht nix groß vormache.

Liebe, Love und Mon Amour

isch spontan, ganz von Natur.

Statt sich mit Date rumzuquäle,

sin’s alle Liebesdag, die zähle,

wo ma an sei Schätzle denkt

un unnernanner mol was schenkt.

Liebe isch groß, bunt, voll Lichter,

Liebe hat so viele G’sichter!

Ohne Liebe uff de Welt

sin au die arm mit viel Geld.

Un manchmol sin scheint’s uff de Erd

oinige so ausgezehrt,

dass die sinnlos un mit G’walt

um sich schlage ohne Halt.

Des macht mi traurig un betroffe

un – des sag ich jetzt ganz offe –

d’Menschheit isch ganz ohne Wert

schlimmer wie e Affeherd!

Do isch jo die als noch sozialer,

ohne Heller, ohne Taler,

Religion, Hochgeischtigkeit,

dort gebt’s aa Kämpf, Gezänk un Streit,

doch hen die Regle: Liggsch am Bode,

geltsch als besiegt (!), un so Idiote,

wo weiter druffdresche un haue,

lebe bei uns, do kriegsch des Graue. (!!!)

Wo sin die Mensche do „human“?

Do ändert au so’n Dag nix dran!

Valentinsdag hin un her –

romantisch bin i trotzdem sehr.

Wenn ich bin zamme mit mei’m Schatz,

do hat nix Anneres meh Platz.

Ach, mit Dir danze, lache, singe,

aus Übermut vom Baumstumpf springe!

Lass uns genieße grad des Lebe,

des duht’s für uns bloß ei Mol gebe,

un alles mitnemme, was geht,

‘s isch nix zu früh un nix zu spät,

ganz gleich an wellem Ort un Disch,

weil all’s mit Dir was B’sondres isch,

geheim, daheim, mit, ohne Leut,

mol abhänge mit Freunde heut,

doch wann mir feiere, wie, was,

des bind ich Euch jetzt net uff d‘ Nas.

Des sagt em Sowieso sei Frau,

un weil ball Fasching isch: Helau!