Sie wolle alles habbe, d‘ Leit,
sie sehe immer bloß d’ Fassad, un nie die anner Seit.
Un wenn se’s habbe, isch’s kurz schee
bis se zum Nägschde übergeh,
des Allerneuscht un Allerbescht,
un niemand interessiert de Rescht.
Die Jagd, die isch de große Kick,
Konsum un Geld, Erfolg de Tick,
un wenn se alt sin dann un satt
un habbe immer ‘s Beschde g’hatt,
dann werre se blötzlich bescheide,
weil d‘ G’sundheit duht im Alder leide,
un sin mit weniger zufridde,
an was duht’s jetzt uff eimol ligge?
Was nützt’s, we ma em Glück nachrennt
un we ma’s hat, ’s gar net erkennt?!
Weil des gebt’s oft – wie kann des sei,
ganz koschtelos un nebebei,
isch uubezahlbar, kommt net z’rück,
emotional, en Augeblick,
en Zufall, e Begegnung als,
so was genießt ma beschtefalls,
e Vögele, e scheene Blum,
sei Lieblingslied, e Tort mit Rum,
me hütet’s wie en großer Schatz,
so wie vom Liebschte als en Schmatz.
Für’s Glück isch ma, so mein i halt,
gar nie zu jung un aa nie z‘ alt.
Danke liebe Petra, Augeblicke feschthalte, Glücksmomente genieße,
Du hasch recht, mer braucht net viel um glücklich zu sei.
Vor meim Fenschter, wenne des schreib‘, grün, grün, grün, prächtige Bäum‘,
wie wennse de ganze Klimawandel nix agehe dät…
Danke nochmol für Dei Glücksgedicht…..
Liewi Petra, liewi Judith,
si sinn wi si sinn im Mai…d’Bisch un d‘ Beem un’s Gras: grie un griener, griener geht nimmeh
un ’s isch wi’s isch, s’Glick: flichdich, flichdich, flichdich…
Musch schun d‘ Auge offehalde un d‘ Hand un Herz noch’m ausschdregge,
a wann’d waisch, dass net feschthalde kannsch …
Du sprechscht mir aus de ‚Seel‘ !
Arg schee, Petra! Un mit jedem Wort hasch recht!