4. August 2023

Urban Gardening

Buddy Hills

Kommentare

„Urban Gardening“ – hatse g’sagt- „mäunt soviel wie: Urbaner, also, städtische‘ Gaardebau“. Sie, des isch die Soffie. Un‘ die isch die Fraa vom Stolle. De Stolle isch en alde Kumbel von mir. Richtig häußter Simon, abber Stolle werdder von uns, seine Kumbels,  immer noch g’nennt. Mir hän uns quasi zufällig vor seinere Hausdier getroffe. Letschte‘ Samschdig. Mir hännd uns mindeschdens zwäu Joahr nimmer g’sähne, obwohl mir seinerzeit in de gleiche Stadt g’wohnt hännt. Er had mich ei’glade und g’mäunt, ich soll doch mol kurz sei neije Eigentumswohnung agugge. Ich däd mich doch noch an sei Hochzeit erinnere, wo er vor zwäu Joahr d‘ Soffie g’heirad hätt. Un so sin mir uf de Balkon zum Stehe gekomme, un sei Soffie hat übber de Gaardebau doziert, von San Francisco bis übber so än Hanseade Hof in Breme‘ un so. Do häb ich g’sagt: „ Au, die Erdbeere in derre Blume Ambel, sin ja scho rot.“ „Willsch äune versuche?“ Hatse mich frehlich g’fragt. D’Soffie isch ä sehr große Äunsachtzig Fraa. Sie übberragt de Stoffel au logger middere Kopfläng‘. „Eijo,“ häbich g’antworded un  ä Erdbeerle abgezupft. Drei Stück sin an demm Büschle g’hängt. Ich find, sie had ä bissle sauer g’schmeggt. Ich häb dann nochemol äune probiert. Die war ä bissle süßer. Ich häb mir gedenkt, äune sauer, äune süß, die dridde bringt Entscheidung. D’Soffie had weider verzählt, vom Urban Gardening. Vonn de Welternährung… dass Urban Gardenig do viel unnerstütze könnt… un de Stoffel isch näher g’komme un hat mir zug’raunt: „ Hasch jetzat alle g’fresse?“ D’Soffie hat isch widder zu mir gedreht un uff än Kürbis gezeigt. „ Guggemol!“ Hadse mich ufg’forddert. „ Was mäunsch was seller Riese Kürbis wiegt? Und dess, dazu noch, uff’m Ballkong g’wachse?“ Ich bin no gedabbt, häbbn fescht in’d Händ g’nomme un hoch g’hoobe. Er war wirklich ziemlich schwer. „ Hasch du den Kürbis jetzat rausg’risse?“ Had mich de Stolle g’fragt. „Oh,“ häb ich g’macht un war voll erschrogge. Dann häbb ich’n schnell widder abg’setzt. Er isch in äm Holzkaschde g’wachse. D’Soffie nennt des ‚Hochbeet‘. „ Hasch Du denn Kürbis jetzat uf de Schnittlich g’setzt?“ Had sich de Stoffel uhgläubig erkundigt, obwohler ned blind isch. Ich häb im erschte Augeblick gedenkt, des wär Gras g’wäse. De Schittlauch war jetzat halt platt geddriggt. D’Soffie had jetzat sehr uhgläubig geguggt. ‚Ahgepisst‘, will ich jetzat ned grad schreibe. Am beschte Ablenke, häb ich mir gedenkt, um die Situation zu redde. Uf de Beddong Ballkong Balluschtrade isch än lange Blumekaste g’hängt un do isch ä mächtig große Zucchini g’wachse. „Heah! Die Zudschini isch abber au än Big Boss!“ Wollt ich die Konversation widder ahrege. Ich bin na gedabbt un wolltse nadierlich nedd hochhebe, so wie denn Kürbis! Abber ich häbb se trotzdem mid de Händ umfasst, um de Umfang zu spüre. „Die Zucchini sin bei uns uf’m Ballkong sehr dankbar.“ Had d’Soffie g’sagt. Ä bissle zurückhaltend. Wie ich des Teil jetzat ganz taktil mid de Händ umfasst ghabt häd, warer unnerhalb dodahl faulig. Gott, war des eklig! Mei Finger sin im G’mies Matsch g’hängt. Pfui Deiwel! Ich häb än echte Schreck k’riegt un wollt mich von demm Schleim Monschter befreie. Sofort häb die Händ wegegezoge un an de blätter abg’schmiert. Vielleicht ä bissle huschplig . De Zuchini isch ins Rolle gekomme. Un wie er übber de Ballkong nübber naus g’rate isch, isch’m nix weidere üwwerig gebliwwe, als de freie Fall. D’Soffie, de Stolle, un ich hännem hinnerher geguggt, wie de Zuchini abwärts nunner isch un zu guter Letscht mit äm fedde Bollerer uf des weisse Dach von em BMW uffgedozzt isch. D’Soffie had jetzat s‘ Flenne ahg’fange. Ich häb mich zu ihr gedreht un wollt‘se tröschte. Ich häb g’sagt : „ So ä großes Mädle weint doch ned!“ Abber statt friedlich zu werre, isch’se jetzat aggressiv g’wordde un hat laut gegeifert: „ Du bisch de blöödschde Freind, den de Simon jee hier hoch gebracht hätt!“ De Stolle had dann deutlich leise g’sagt: „ Du gehsch‘ besser, Meininger!“ Ich häb d Hände-Hoch g’macht un g’rufe: „Regt eich ned so uf! S‘isch ja scho guud. Ich geh. Abber ä Tomaat nemm ich noch mid.“ Also häbb ich nachener Tomaat gegriffe. Die dabbige Tomaat isch so fescht an ihr’m Strauch g’hängt, dass ich de ganze Strauch mitsamt äm Blumekaschte umgezoge häb. Des ganze Grienzeix isch von dem Tischle nunnergeknallt un uff’m Balkongbodde mid denne rote Klinkerplättle verstreut zum Liege gekomme, mitsamt de Erd‘. Ich häb nur noch de Uffschrei von de Soffie g’heert. Bin schnell in die Wohnung nei, an die Wohnungsdier, un nix wie naus ins Trebbehaus! Die Tomaat häbb ich in de Hand g’hätt. Die war abber noch halber grie. Do häbb ichse übber mei Schulder wegg’schmisse, weil ich sauer war. Wie än Hund isch die komisch‘ Tomaat uf de Trebbe abber dann nebbe mir mid nunner g’rollt, so hart ische se g’wäse. Wo se mich hat übberhole wolle, hatse von meim legendäre Linke än Kick ‘kriegt un war dann vor mir unne. Un übberhaupts: vom Urban Gardening halt ich emol garnix!

2 Kommentare

  1. Pierrette KRACKE

    Uf jede fall ; d’r Meininger hat total verbot i’miner gaaarden zu gehe !!!!!

  2. Petra RieBüh

    A, so en Pech aber aa!