Ich will jetz net vom bescheuerte Minischderium rede,
wo sei Aigeschaftswort vum Minischder griegd hot.
Mich regd schun lang uff, dass mer bei de Audo indernazional
so e derre Sau dorchs Dorf dreibt, wo de Arsch net hochgriegd,
weil se mit ere schwere Batterie belaschded isch.

Alles Megliche wird schun lang im Brifade mit Batterie ohgedriwwe,
un alle wisse mer, was die Laderei efders fer Ärger macht.
Un exblodiere duhn se als aa.
Fer Hendy un so kammers jo noch akzebdiere,
awwer fers Audo?
Die Audo hod mer bis vor korzem noch abgschbeckt zum Gwicht schbare,
un d Modore kloiner gmacht, mer hod alles daun-ksaisd.
Dann sen die Abgasregle kumme un alle hen gmoind, des gengd blos mid Batterie.
Die Batterie sin awwer so schwer, dass glatt 500 Kilo unedich dorch die Gegend
kärchelch. Un Energie un Raife koschds a no.
Druff had mer dann die SUVs hochgepuschd,
weil mer do die dicke Zusatzmasse besser hod verschdeckle kenne.

Ganz langsam isch dorchgsiggerd,  dass mer a schdat Windräder abzuschalde,
mid dem iwwerschissige Umsunschd-schdrom griene Wasserschdoff mache kennt.
Mid Brennschdoffzelle un Wasserschdoff kehmd hinne blos noch Wasser aus em
Auspuff. Awwer fer de Wasserschdoff zu lagere braucht mer en hoche Druck vun
700 Admosfähre, im Audoraife hasch grad emol 3!
Un wenn e drohdenk, dass Mensche bleed gnug sinn,
mid dem bissele Druck vum Schdadtgas ihre Heiser ind Luft zu jage,
dann mechde koi so e Audo in de Garasch schdeh ho.
So lang alles dicht isch, gehds, awwer wie mer herd, diffundierd de Wasserschdoff a
dorch die Wand vum Tank un dorch kabutte Dichdunge, un weil er leichder isch als
Lufd, kennd er sich zum Beischbiel an dene Fächer fun de Unnerzieg in de
Diefgarasche osammle bis es zu Knallgas raichd, dann langd en Schalderfunke,
dass es krachd.
Mid Audogas  derf mer schun lang net in Tiefgarasche parke, bei dene sammeld
sich awwer des Leckaschegas unne, weil des Audogas schwerer isch als Luft.
Zum Blouapp dähds awwer aa lange.

Also i moin, bis jetz bin e mid meim Minidiesele  noch am gscheidschde unnerwegs.

Es gebt gottseidank awwer a noch annere, wo des so sehn, un deshalb wille jetz
von dene redde.
Aus Wasserschdoff un em Kohledioxid aus de Luft kammer nämlich mid dem
Schdrom Methanol mache un domid kammer aa Brennschdoffzelle bedreiwe.
A do kummd aus em Ausbuff blos Wasser und des Kohledioxid, wo mer vorher aus
de luft ghold had. Die Tankerei geht so wie jetz a in e Paar Minude un ohne den
hoche Druck, aus de selwe Tanksäul wie jetz.
Un wenn mer aus dem Wasserschdoff de griene Fjuel produzierd, ko mer mid dem
a noch Flieger un alde Kolbemodore umweldfreinlich bedreiwe.

Bei dem viele Geld, wo die bis jetzerd fer die Badderie verbrode hen,
befirchd e allerdings, daß se alle annere Padende ufkaafe un ind Schublad lege,
bis mir Verbraucher den ganze Battriekram bezahld henn. Un des Schlimme isch,
dass die bescheuerte Politik des net kapiert un a noch odreibt.

Wahrscheints werre den Eisatz vun Vernunfd in der Sach nemme erlewe.
Laider…….

OA0221