Samschdags noch schnell zum Metzger

Korz bevor die zu mache

Noch e Klennichkeit bsorche zum veschpere

Hunnert Gromm Uffschnitt, meh brauche mer net.

Drei, vier Leit vor mir

Ich hebs e bissl eilich

Jesus, die vor mir kaaft de Lade leer

En riesiche Fleischberg mit weiße Verpackunge

Türmt sich schun hinner de Thek uf

Un die guckt als noch en de Auslache her un nor

Ich kennt wette, die isch noch net ferdich

Derfs noch ewwes sei, heri die Verkäuferin

Jo, noch zweihunndert Gromm vun sellere Worscht

Un drei Kräutersteaks… un die Londjäger dun mi a so orlache…

Gewwe sie mer vun denne a noch zwei Pärlin mit..

So geht’s en orm fort. Ich glaab, die will heit noch ehre gonz Vertl eilade zum Grille.

Endlich isch se ferdich… halwer dormlich wonkt sie zu de Kass niwwer,

ihre gfühlt drei Seesäck voll Sach zu bezahle…

Ich hebs wieder goldich verwischt heit, weil der älter Monn vor mir isch a net schneller…

der frogt zu allem Übl noch, was en derre un in sellere Worscht so alles drin isch…

Ou, mit Kowwlich… ? Noi, dann liewer net…

Hm, un en sellere do isch Kümml drin… des willi gar net…

Jesses, ich merk schun, des gibt e längeri Sach, bis der Schleckhaffe endlich zufriede isch…

Jedes Mol de gleich Käs dohin, denk ich mer

Willsch uffen Schrpung schnell rei, bloß e bissl Ufschnitt hole,

un sitzsch e Ewichkeit fescht…

Obs vielleicht mittlerweil wecher dem so viel Vegetarier und Veganer gibt,

frog ich mich. Weil beim Metzger vor lauter Warte

schterwe kennsch, un s´däd wahrschoinlich net emol ewer merke?

Endlich, endlich, ich näher mich moim Ziel

Oifach drorkumme un schnell verschwinne, sag ich mer

E Glück, dass ich voraussichtlich noch hormkumm, bevors Wocheend rum isch

Jetzt… wirklich… ich bin en de Reih… also, dreihunndert Gromm Ufschnitt willi…oder wares hunnert? Ich weiß nimmie genau… egal… ich nemm

liewer mol vierhunnert, wer weiß, un heit isch somschdag…

mmh, die Schwenksteaks do hinne sehe awer wirklich appetitlich aus…

ferdich eiglegt…. die müssti grad noch schnell uf de Grill schmeiße..

ich merk grad, dass mer´s Wasser im Mund zommelieft

un dass ich en Riesehunger heb…

Fünf Stick vun denne Steaks her ich mich sache…

vier Pärlin Thüringer… zwei Rindersteaks a noch bitte…

acht Cevapcici… un die eiglegte Peperoni-Schofskäs-Schal nemmi a noch mit, die lacht mi jo so or…

Wie bitte? Obs noch ewes soi derf?

Ich schpür die eiskalte Blicke vun denne, wu noch hinner mir warte, wie Giftpfeil in moim Rücke…

Des isch mir jetz awer egal… ich heb schließlich a long warte g´misst.

Un wu ich jetz schunemol dror bin, heißts, bloß net vorzeitich ablosse.

Wie en Jagdhund uf de frische Fährte.

Fünf Paar Wienerlin, vier Päckle Mauldasche, e Kilo Gulasch un drei Wiener Schnitzl ferdich paniert wondere noch in mei Dutt,

wu längscht die Aumaße vunerem mittlgroße Reisekoffer hod.

So. Danke. Des war´s dann.

E Glick, dass mer mit dem Kärtl zahle konn.

Weil ich heb grad noch siebzich Euro em Geldbeitl debei.

Des hätt ga net glongt.

Un des alles wecher bissl Ufschnitt.

Mer glabt jo gar net, wie deier heitzudag alles worre isch.