Bleiern liegt die hitzich Luft iwerm Dorf

Kriecht en jeden Winkl nei

Find a dich un mich.

Legt sich heiß un schwer uf alles.

Wie ausgschtorwe die Strooße

Do hinne flimmert die Luft vum Feld her

Vechl suche letzschte Wassertropfe

Sogar dem kläffiche Hofhund ischs Belle zu orschtrengend.

Ventilatore un, glücklich wer oi hot, Klima-Orlage laafe

Schweißdurchnässt aussem Auto nei en de Eikaufsmarkt

En Temperaturunnerschied vun feierheiß zu oh, wie schee kühl

So orgnehm, dass fascht nimmie gehe willsch.

S´ Eis verlieft sich im Eiskaffee schneller wie´s esse konnsch

S´Mineralwasser werd knapp

Autobahne platze uf vor lauter heiß

Un die Bohr´ ruft ihre Kunde uf: Fahret liewer net mit uns.

Die Wetterkart im Fernseh isch nimmie bloß rot, die isch jetz violett

Mit ernschte Miene ergehe Appelle, bloß net naus in die Sunn zu geh

Viel trinke un in kühle Räume bleiwe. Wenns die nur gewwe däd.

In de Wohnunge un de Kronkehaiser un Alteheime – innedrin 35 Grad.

En so hitziche stickiche Dag un Nächt

Denkt mer voller Sehnsucht enneren kalte, verrecherte Novemberdag

Wie´s Rechewasser wie e kloi emsichs Bächl em Schtrooßegrawe entlonglieft

En alles des denksch. Jetz im Juni. Wu der nix wie de Schweiß lieft.