Strandkorbgflüschder

„So, un wie funktioniert des jetzt mit dere bleede App? Früher hasch beim Strandkorbwärter e Schlissele kriegt un schwupp war des Schloss uff! Awwer noi, s’muss jo alles uff dere Welt verschlimmbessert werre!“ Mei bessere Hälft zetert wie en Rohrspatz. Er kniet im Sand vorem blaugstroifte Strandkorb Nr. 83 (s’war de letscht wos gewwe hat!) un versucht mit seim Handy dem Spezialschloss beizubringe, dass die neue Mieter vorem Korb stehe. Im Moment sieht’s awwer schwer denoch aus, als müsste die de Rescht vom Stranddaag gnau dort verbringe: nämlich vorem Korb un net drin. Jetzt werd wie wild en Code ins Handy getippt un mol von rechts un mol von links an des runde Ding nag’hobe, des ageblich e Schloss sei soll. Irgendwann reißt meim Strandkorbsachverständige de Geduldsfade un er haut zornig uff des Ding druff. „Klick“ machts un jetzt steht uff oimol eme grenzelose Strandvergnüge nix mee im Weg. Sodd mer moine!

De Korb wird inspiziert! Er hat am Rückedoil sogar e Schnürle gspannt, so dass mer s’Strandduch neiklemme kann. Sozusage e Luxusmodell! S’nutzt awwer nix, weil scho beim Probesitze rutscht oim des Duch glei widder nunner ins Kreiz. Do soddsch e paar Weschklemmerlen debei ho; hemmer awwer net. Apropos probesitze: kann des sei, dass die Strandkörb früher broider ware? Odder ware nur mir schmäler? Jedenfalls zwänge mer uns ziemlich b’häbt uff des Sitzbänkle un kriege bis zum Obend bstimmt Druckstelle uff de Hüfte.

Hasch de im Korb dann endlich zurechtgruckelt, falle der d’Fieß ei! War do net was? Also widder runner vom Bänkle un die zwoi Schublädlen unnerm Sitz vorgezoge. Jetzt hen au d’Fieß en Platz. Awwer sie hänge immer noch arg weit nunner – des isch nix fers Kreiz. Also werd unnerm Fußschublädle mit de Händ e ordentliche Düne gschaufelt- jetzt basst’s! Bloß hasch mit dere Aktion halt au die erscht Ladung Sand im Korb un s’kratzt ugmütlich unner de naggiche Wade. Des werd ignoriert un erscht mol dief die gsund Meeresluft inhaliert. Do liegt se, d’Oschtsee un rauscht mit e bissle müde Welle vor sich na. Ich fühl me so müd wie die Welle un mir falle d’Auge zu.

Ebbes klappert un ich fahr verschreggt widder hoch. De Gatte hat des kloi Dischle an de Seit entdeckt un rausgeklappt. Jetzt hoggt er do, wie oiner im Flieger, der druff wartet, dass em d’Stewardess en Tomatesaft serviert! Do kanner lang warte! Die Dasch mit em Fudder steht nämlich bei mir un ich klapp schnell d’Auge widder zu un lass me vom Meeresrausche eilulle. Wie ich se s’nächscht Mol wider uffmach, seh ich statt blau uff oimol rot. In mei Blickfeld nei isch e rotes Zelt gwachse. So e halbs Iglu, in dem sich e vierköpfige Familie vorem Oschtseewind versteggle kann. Ja, des hat mer jetzt grad noch gfehlt! Empört setz e me uff. Ich hätts besser bleibe lasse, weil hinne rutscht jetzt widder s’Strandduch ins Kreiz un gleichzeitig geht vorne die Sanddün’ bade un s’Fußbänkle hängt widder nunner. Awwer bevor ich mit dem ganze Zirkus widder von vorne anfang, gugg ich mir die Neuzugäng erscht emol an.

D’Mudder un de große Bub hen sich ins Zelt verkroche. De Vadder steht am Strand: kerzegrad, wie wenn er en Stock verschluckt hätt. Sei keesige Stachelbeerwade, die aus de kurze Hose rausgugge, hen diesjohr noch koin Sonnestrahl gsehe. Irgendwie wirkt der wie en Owwerlehrer uff me. De pädagogisch Blick isch uff sein Jüngschte grichtet, der selbschtvergesse un glicklich mit seim Plaschdikschäufele im Sand buddelt. „Du hast die falsche Schaufel! Du musst die Metallschaufel nehmen!“ kummts von owwe. De Kloi folgt un bloogt sich jetzt mit de Medallschaufel. Owwe werd de Kopf gschiddelt: “Du musst den Griff richtig fassen, schau so!“ De Kloi probierts. „Nein, du  machst das falsch! Ich habs dir doch gezeigt, wie!“ De Kloi versuchts besser zu mache. De Vadder schiddelt resigniert de Kopf unner seinere Dätschkapp. Jetzt hat er e Idee! Vielleicht ischs doch koin Lehrer sonnern en Archidekt, weil jetzt wohl e Sandburg gebaut werre soll. Un en Bauplan dezu exischdiert scho hinner de vädderliche Stirn. „Bring doch mal einen Eimer Sand!“ Dapfer füllt de Kloi sei Plaschdikoimerle un hebts stolz em Babba na. „Ja was ist das denn? Der Sand ist doch viel zu trocken! Schau, wir holen jetzt einen Eimer nassen Sand!“ De Kloi guggt un de Vadder schaufelt. „Hierher bauen wir den ersten Turm!“ De Kloi guggt un de Vadder üwwerlegt: „ Und nun machen wir…..“ De Vadder baut die Sandburg un de Kloi macht jetzt gar nix mee. Passiv un üwwerflüssig steht er im Sand rum. Ach, dud mir der Kerle loid! Vielleicht ischs als doch gut, dass sich net alle Vädder um d’Erziehung kümmere?

„Moinsch net, mir sodde de Korb e Stückle rumdrehe, so dass mer noch e bissle Sonn abkriege?“ frogt mein Egon. Mir ischs recht, weil dann muss e mir des Sandburge- Elend net länger agugge. Mir wuchte also des schwere Doil mitnanner rum un mei bessere Hälft lasst sich erleichtert neifalle. Irgendwie hätte mer wohl de Stand noch üwwerprüfe solle – jedenfalls neigt sich de Korb nach hinne, schwebt noch e Weile unentschlosse in de Luft un blotzt dann rückwärts in de Sand. Do liegt er jetzt uffem Buggel, wie en Maikäffer un owwe strample zwoi Stachelbeerwade in de Luft – nur diesmol sens die von meim Mann!

Von allene Seite komme se zur Hilf grennt un ich muss dem Sandburgebaumoischder Abbitte loischde, der isch nämlich als erschter zur Stell. Mitnanner richte se de Korb widder uff un kontrolliere, ob de Inhalt uverletzt gebliwwe isch. Un ich muss ene allene hoch arechne: s’hat koiner g’lacht! Die oinzige die g’lacht hen, ware mir selwer –  e bissle später, wo de Schreck verdaut war.

So langsam sinkt die Sonn un s’werd frischer. De uffblosbare Krokodile geht d’Luft aus un sie sinke erschöpft in sich zsamme. Ringsum werre Bollerwäge belade, Stranddasche gepackt un des ganz Geraffel widder vom Strand fortgschleppt. Ich gugg de Strandflüchder hinnerher un bild mer ei, zu erkenne, wer von denne en Strandkorb g’habt hat. Weil ordobädisch empfehlenswert isch des Sitzmöwwel net! Do jubiliert irgendwann s’Kreiz! Un die do so gebüggt durch de Sand schleiche un sich erscht uff de Uferpromenad widder uffrichte könne – die sin garandiert dringhoggt! Un weil mir selwer dazughöre, isch au unser Abgang net von de uffrechte Sort. Awwer so was kann doch unser Urlaubsvergnügen net schmälere – des wär jo noch scheener! Un so werd obends noch emol sportlich in dere App nochgeguggt: vielleicht gebts für üwwermorge doch noch wo e korbgschütztes freies Plätzle?!