Still ruht de See…

De Parkplatz isch riesig un nur zu eme Achtel belegt. „Jesses, hen se do alles zugepflaschdert! So war des früher net.“ Zwische all dene graue Pflaschderstoinlen wirke drei blühende Kirschbäämlen fascht wie Fremdkörper. „Un wo soll jetzt de See sei?“ „Des isch net weit. Oifach do vorne durch selle Unnerführung un in zwoi Minudde sen se dort!“, versprecht en Fußgänger, der mit em Rucksäckle uffem Buggel grad an uns vorbeispurtelt.

Alla gut, des sodd au zu schaffe sei, wenn’d jetzt grad net so gut zu Fuß bisch. „Hättsch halt e Paar gscheide Laafschuh mitgnomme!“ bruddelt die besser Hälft ohne jegliches Mitgfühl. Mir troddle los. Bis mer endlich die Bahngleise unnerirdisch hinner uns glasse hen, sen scho fünf Minudde rum un noch koin See in Sicht. Was hen d’Leut oigentlich für e Zeitgfühl? Mich beschleicht de Verdacht, dass aus dene zwoi Minudde lässig zwanzig werre könnte.

Mir üwwerquere en Kreisel un jetzt biege mer ganz offesichtlich in die Zielgrade ei. Vor em Seeblick hasch nämlich zuerscht noch des touristische Pflichtprogramm zu absolviere: e endloses Spalier von Gschäftlen un Fressbudene. Do laafsch jetzt durch e Schwarzwaldidylle der annere Art: Guggugsührlen aus Plaschdik, Dirndelmode aus Bangladesch, Badeente mit Bollehut un jede Menge Plüschgetier. En grimmiger Schwarzwaldwolf baumelt Fell an Fell newwe me niedliche weiße Lämmle.

„Oh, riecht des so gut, was ischen des für e Wurscht?“, die do so begeischtert losjubelt hat in ihrm enge Stretchkloidle selwer e gwisse Ähnlichkeit mit dem begehrte Nahrungsmiddel. Ich schnupper, riech awwer nur Friddierfett, des scho emol bessere Dääg gsehe hat. Drei Schritt weiter kriegsch dann „de bescht Burger in Town“ versproche. De eigschweißte Schwarzwälder Schinke im Gschäft newwedra wirkt do dagege scho fascht authentisch.

D’Menschedichte hat inzwische merklich zugnomme. Um uns rum herrscht e babylonisch’s Sprachegwirr. Unner em hochgstreckte Fähnle versammelt sich e Herd von Asiate. Ich frog me, was die wohl für e Bild aus Deutschland mitnemme? Un ich frog me, wie des wohl in de Hauptsaison zugeht, wenn der Parkplatz do owwe mol voll belegt isch? Kriegsch den See dann üwwerhaupt noch zu Gsicht? So wie mir jetzt. Vor uns doilt sich die Menschemeng un was do im Sonnelicht glitzert, isch zweifelsfrei de See. Mehr odder weniger ufreiwillig werre mer von hinne uff en Landungssteg gschobe un eh mer uns rumgugge, hogge mer uff de MS Ingrid für e Seerundfahrt.

Jo, a recht! Werd halt aus eme Seerundgang e Rundfahrt. Für mei gschundene Fieß allemol besser. Mir schicke uns nei, strecke unsere Nase in de Fahrtwind un lasse schließlich jeden Widerstand sause. Do middel uffem Titisee fühle au mir uns endlich wie echte Tourischte.

Wie mer widder an Land ausgspuckt werre, spurtel ich zielstrewig uff den Uhrelade zu. „Was wird en des jetzt?“, frogt de Gatte ahnungsvoll. „Woisch, was mir jetzt mache? Mir suche uns e scheens Guggugsührle aus! Findsch net, dass die Wand newwerm Wohnzimmerregal e bissle naggich aussieht?“ Newe mir werd kurz gschluckt. „Wenn’d moinsch – awwer dann gehe mer au do vorne noch nei un esse de bescht Burger in Town!“ „Ubedingt!“, stimme großmütig zu.