Wenn des sei Dande wisse däd, dass ihr Neffe, de Herbert Huck, bei`rer Psychotherpeidin im Kabineddle hockt! O Jesses-Gott! Alle nenne ihn eigentlich Hörbie . Außer de Dande! Die immer: Herbert. „Ihr Dande, also“, wiederholt die Psychotherpeidin, „ isch in Bad Herrealb verstorbe, nachdemm se sogar s`Corona üwwerläbt hod.“ Sie schwätzt Dialekt. Dess macht`se em Hörbi scho au symbadisch. Sie trägt ihre wild g’loggte, rode, Hoar mid so em griene Tuch un` wäuße Dupfe druff; verwege z’sammegebunde. Un‘ sie steckt au noch in äunere lachsfarbene Latzhos. Äm` Herbie sei Eindruck isch: ä Losleg-Frau! Ob`se wohl au ganz gern ä Bier trinkt? Es werd`ihm awwer bal` klar, dass des Bäuchle eher vonnere Schwangerschaft herrühre dud. „ Un sie hod immer alläu g’lebt, ihr`Dande? In derre große Villa?“ Bleibt die Therapeidin beim Thema. „Vor Zeide`war se au mol mid äum Kerle z’samme. Ich glaab, die wared awwer bloß verlobt.“ Erklärt de Hörbie. „ Er hod Jürgen g’haiße un`bei äm Uhfall hodder noch sei Bein verlore. Ich wäuß jetzat garned, ob links oder rechts. Er muss wohl arg verbiddert g`wäse sei. Irgendwann ischer wohl äufach verschwunne. Ich häb denne nie kenneg’lernt, awwer die Dande hod nie mehr än annere Mann g`hädd, so wie ich des seh.“ „Sie isch wohl äußerscht hochbetagt verstorbe, ihr Dande“, fragt die junge Therapeidin, ä bissle nachdenklich. „Viere-Neinzig Joahr,“ bestätigt de Hörbie. „Wisset`se“, fahrter fort: „Ich schaff als Koch in Herrealb. Un so häb ich die Dante dort in ihr`m Altershäum immer in de Näh g’hätt.“ Jetzat erklärter ausgiebig, wie er als Kind von äm Kinderhäum, in de Dande immer ebber wirklich Verlässliches in sei‘ m junge Lebe g’hatt hätt. Ebber, der fier ihn verhältnismäßig viel do war! Wo sei Mudder mit ihm nix had ahfange könne un selwer äufach nur abgedriftet isch. Ferie, Oscht’re oder Weihnachte un so…hadder – so gut wie immer- in de` Villa bei de Dande zugebrocht. „Do war viel Bildung in ihr’m Lebe“, verzählt de Hörbie. „Des hod mich jo au irgendwie tangiert. Awwer die große Bedeidung für mich, war g’wäse, dass’se mir viel Verständnis un`Geduld entgege gebrocht hod.“ Die schwanger` Therapeidin isch voll konzentriert uf denne Herbert Huck. Sie isch awwer au neigierig, glaabter zu erkenne. Un` er wäuß, zum neigierig sei, muscht ned uhbedingt Psychotherapeidin sei. Awwer wahrscheinlich ergänzts sich. Er reisst sich los von denne Gedanke un gäbbt sich widder seinere Erzählung hie. „Wo ich dann erwachse g’worde bin, verheiradet, g’schiede, un` seller ganze Zinnober…..ich häb se s` ganze Lääwe immer regelmässig b`sucht. Alsmol sin mir in Ettlinge än Kaffee trinke g’fahre, odder ich häb se uf Karlsruh` zum Esse ausg’fiehrt.“ Er hockt bei derre Latzhose-Psychotherpeidin, un‘ es steige uhwillkierlich än Haufe Erinnerunge in ihm hoch. Wirklich än Haufe im Sekundetakt. „Un`so hän Sie dann die Villa g’erbt?“ Unnerbricht sie sei‘ memoriale Sortierung „Ja.“ Folgt sei Bestätigung.. „Sie hod in ihr’m Teschtament g`schriwwe, des soll alles ihr Lieber Neffe erhalde. ‚Lieber Neffe‘ hod’se wördlich g’schriwwe.“ Die Psychotherapeidin lacht ä bissle und sagt: „Des kling schee.“ Sie isch noch jung. Wär se älder, däd se nimmer so lache. So jung, un ä eigene Psychotherpeidinne Praxis! Denkt sich de Hörbie. Un‘ sie: „ Mid demm Erbe hän se in ihr’m Lebe jetzat jo hald scho au ä sehr relevante Veränderung.“ De Hörbie erwidert: „De pure Stress häb ich g`hätt. Ma isch fix und ferddig mid so äm Dinosaurier Bauwerk zum verkaafe.“ „Was brauchet`se, dass se sich bald widder davon erhole könne?“ Harkt die Therapeidin g’schult nach. „Mei Ruh.“ Gebbt ihr de Hörbie kurz un` knapp als Antwort. Sie streicht mid ihrer Hand üwwer ihr`n schwangere Bauch und mäunt lakonisch: „In de näxschte Zukunft werre se b’stimmt viel ruh`finde. S’liegt jo jetzat au an Ihne, wasse drauß mache.“ Un‘ wie se ihr ganze Sitzhaldung verännert, kommts se uf de Punkt: „Sie hän de Schlüssel!“ De Hörbie guggt uhgläubig in des G’sicht von derre Rothaarige mit dem freche Look. „Heijoo! De Schlüssel! Den häbb ich.“ Sagter sehr präsent. De Hörbie hockt jo bloss do, weil se selle geheime Tür uffkriege wellet. Un mid derre Rumschwätzerei kommt ma au ned weider. Er hod nämlich au ä ganze Weile gebraucht, um denne Schlüssel zu finne! Wie die Psychotherapeutin nämlich die Villa von ihm gekaaft hod, un alles geregelt war, was so zu äm Hausverkauf dazug’heert, isch se uff die verschlossne Eisetür im Keller g’stoße. Sie had de Hörbie ahgerufe un‘ sich erkundigt, obber fier die Gusseisetür noch än Schlüssel hädd. Des Merkwürdige isch awwer, dass de Notar bei de Teschtamenteröffnung ihm denne Schlüssel ,im Auftrag von de Dande – Gott hab se selig – so richtig offiziell üwwergäbbe hod. Des war jo ned de Haustürschlüssel von de Vila und au käun Schlüssel mid Symbolkraft. Es isch un bleibt de Schlüssel von derre Kellertür. De Witz isch, dass de Hörbie die Kellertür au noch von seinere Kindheit her kennt. Awwer sie war immer verschlosse, grad so wie ä Tresortür. „Dande! Vielleicht isch do en Schatz versteggelt?! Hodder ä zeitlang versucht, sei Wohltäterin zu bewege, seinere Entdeckungsluscht zu entspreche. „Näu, Bu!“ Hoddse g’lacht. „Do unne gäbbts nix.“ Mid de Zeit halt, isch die Erinnerung an die Tür immer mähner verblasst. Awwer jetzat langt de Hörbie nach demm große Schlüssel in de Jackedasch un üwwerreicht’n de Therapeidin. „Wolle se mich begleide, un mir öffne gemeinsam selle geheime Tür im Keller?“ Un so steige se kurz druff gemeinsam die tiefe Kellertrepp nunna. De Schlüssel find‘ ä Weile ned de richtige Schließweg. Er dreht dauernd im Leere un grad wo de Hörbie sage will, sie soll ihn emol ra’lasse, hat’se de Dreh raus g’funne und de Schlüssel greift in de Schlossmechanik. Sie stoßt langsam die uhmeglich schwere Eisetür uf. Än uhglaublich kalde Luftzug kommt ihne überraschend entgege. Ma kann nix erkenne. Es isch stockdunkel. „Ich häbb mei Handy noch owwe in de Jackedasch.“ Fallts äm Hörbie ei. „Ich kann mid mei`m Licht mache.“ Schlagt die, jetzat ganz neije, Villabewohnerin vor. Sie nemmt ihr Handy in’d Hand, um uf Taschelampe-Funktion zu schalde. Endlich könned`se z’samme denne Keller betrete. Die Wänd` sin grob un aus klotzige Sandstäu`quader g’mauert. Ä hohes Kellerg’wölbe trägt mindeschtens die halbe Villa, üwwerlegt de Hörbie. Es isch grad so wie de zugängliche Teil vom Kellerg’schoß konschtruiert. Er flüschtert ehrfürchtig: „Willkomme in Alt – Ettlinge.“ De Raum scheint an sich ziemlich leer zu sei. Es stehe bloß hohe Metallregale im Raum rum. So bissle uhwillkürlich abg’stellt. Die Fächer sind ebbefalls komplett leer. Gar käu spannende Stellaasch zu sehe. Er hätt sich do ä bissle mehr erwarded, ä bissle spannender! Die Therapeidin fahrt mid ihrem Handy- Taschelampe Lichtkegel langsam, systematisch, durch de Raum. Plötzlich zuckt se z‘samme. Es braucht ä Weile, bis de Herbie kapiert, was do de Lichtstrahl entdeckt hod: Ä Skelett! Ä Menschliches! Ä Einbeiniges! Die Therapeidin losst än grelle Schrei los. Des verschreggt de Hörbie noch mehr als de Doodeschädel, der do ins Handylicht neiglotzt. In ihr’m Bauch spürt die junge Psychotherapeidin, wie ihr Baby, wie in großer Panik, gegge die Bauchwand trete dud. „Oh Jesses!“ Ruft se laut. „Ich muss raus.“ Sie wend‘ sich um un` rennt ihr‘ m Handylichtkegel hinnerher. Nix wie aus demm Keller naus! Un`bloß schnell die Trepp` hoch! De Hörbie hört bloß noch, wie die schwere Eisetür hinner ihm krachend ins Schloss fallt.