Jetzt fliege se widder, die kloine Missedäder, un bringe en großer Doil von Mitmensche awer so was von zum Nieße, dass alle Annere ganz verschreggt rumgugge. Noi, nix Corona, ehnder Populus alba (odder uf deitsch “Silwerbabbl”). Von denne hats bei uns em Neereder Diefgschdad grad gnunk, wann a scho viele von’ene altersbedingt umgschderzt sin un vor sich na modere. Awer der Rescht macht uns Allergiker trotzdem noch ganz schee zu Schaffe:

’s kloine Babblbliehdeallergiegedicht

(mit’eme Dascheduch in de Hand zu lese)

Im Maie, im Maie – schnief
duhts von de Babble schneie, – schnief
wiegt sich im laue’ Frühlingswind, – schnief
senkt sich uf Mann un Frau un Kind, – schnief
legt sich leis uf Disch un Bank – schnief
un macht so manche Mensche krank – hatschieeee!

….

(Halded eich dapfer un bleiwet gsund)