’s Erschtklässler „z“

Ledschd an de Philippsburscher Grundschul‘..

„So…“ meent da jung Erschtklasslehrer,  „…letzte Woche haben wir das große „Z“ schreiben gelernt…wer von euch kann mir nochmal Wörter mit dem großen Z vorne nennen?“ D‘ Kinner rufe: „Zeit“ un „Zug“ un „Zahn“  un da Herr Sommerfeld-Bringsen isch zufriede un fahrt fort: „Heute wollen wir das kleine „z“ schreiben lernen…das steht manchmal auch am Wortanfang, oft aber auch mittendrin im Wort. Wer kann mir ein Beispiel nennen von einem Wort, wo’s kleine z am Wortanfang steht ?“ „zusamme…stimmt’s (?)“ …dann folsche „zeigen“ , „ziehen“…  „Ja, alles o.k. ! Jetzt vielleicht aber noch eines, wo das z im Wort mittendrin ist…“

Da gnitz Paul, da Bu vum Aussiedlerhof-Bauer, schdreggd als erschder un grinst debai iwwa’s ganz Gsischt: „Geesezitze“ ruft er ganz laut  un kaum hot’er’s grufe, schreit da Ohan: „Ey Mann…Gee-se-zit-ze…der macht Witze !“ un d‘ Kinner  doowe vor Lache. Was fa e scheens Wort !!!

Awwa jetzt hot da Lehrer e Broblem: erschtmol fa sisch selwer zu gläre: was sin „Geese“ ? , un dann a fa mansche Kinner: was sin „Zitze“ ? Dass d’Geese Ziege sin, war glei geglärt, mit de Zitze war’s nit ganz so eefach. Un am schnellschde isch dem Junglehrer dann eigfalle, das dess scheene Wort vum Paul in de Hochdeitschform sogar 3 z hot: e großes un zwee glaane… „Toll !“ hot’er da Paul globt.

Seit dem Moment rutscht ’s glaa Helmutl ganz uriewisch uff sei’m Schduhl rum , dann uff emol zählt’er was an seine Finger ab un schun weddld er wie en Wilde mit de Finger in de Luft rum un weil nimmand noch’m guckt, joomerd’er laut: „O Mensch Herr Lehrer…isch kumm garnit draa…!“   „Wieso, was möchtest Du denn ?“

Er schdrahlt un meent: „Isch…isch hab nämlisch noch e viel bessers Wort…du wärrsch schun sehne…meins hot sogar 4 z drin !!! “ un dunkt noch vielsaachend  debai.  „Okay…dann sag es uns halt…“

„Mhm“…’s Helmutl macht’s noch schbannend, ziehscht ’s Gnick ei un guckt gradaus un muckt dezu  :

„…do vorne schdeht si doch…uff deim Pult … d‘ Az-fenz-kranz-kärz…   un hot 4 z, odda ? „: