1. April 2023

Rate, rate, was isch das? Isch kei Fuchs un isch kei Has …

Petra Rieger-Bühler

Kommentare

Welle unner freiem Himmel

wachsende Pflanz – es isch kei Primel,

gebt’s in Klei un aa in Groß,

sehsch in Vase aa mol bloß,

in de Gärte do drum rum

findsch die Dinger. – So e Blum

kann von weitem als manchmal,

wenn se in de Überzahl

isch, aussehn wie Sternle gar,

meistens gibt’s davon e paar,

wenn se so im Frühling jetzt

wachse duht uff b’stimmte Plätz.

Worzle hat se koine draa,

defür e Zwiebel, die duht’s aa,

weil die isch praktisch immerhin,

do kann se sich versteckle drin,

wenn’s zu heiß werd oder z‘ kalt,

bis se neu im Glanz erstrahlt,

ganz blötzlich aus em Bode schießt,

scho lang bevor den jemand gießt,

un dann mit hohe, schmale Blätter

do drauße steht bei Wind un Wetter.

Kei Unkraut isch’s, was ma net will,

noi, selles Pflänzle hat scho Stil!

Allei die Blüte – do bisch platt,

henn Zacke draa, wo keiner hat,

in Farbe Weiß, Orange un Gelb,

do wächst des Zeug – ’s isch alles ’s selb!

 

Du findsch’s als au beim „Penny“ drin

oder beim „Lidl“ –  geh mol hin,

do werd’s verkauft in Töpfle, kloine,

oder in Schale, un willsch koine,

dann kannsch so Blümlen aa noch finde

beim Gärtner oder „Heckert“ hinde.

Grad jetzt sin die de große Renner,

die Sort gebt’s allerdings scho länger

in Groß un Gelb, ganz uuverwandt

hat die mei Oma scho gekannt.

Jetzt aber müsst de Grosche falle,

ich schwör, Ihr kennt se wirklich alle (!),

bei uns, do gucke die vor’m Haus

zwische de Stiefmütterlen raus.

Sie hen drei Name – ohne Bluff,

vermutlich kommet Er glei druff,

wenn ich Euch nenn so e paar Sache,

wo in de Kirch viel Sinn als mache,

do locke die mit viel Gedöns

die Leut hie, des isch halt was Schön’s!

 

D‘ Blümle drauße sind ganz still,

obwohl se aa, we ma so will,

recht eigebildet sin un eitel,

stolz von de Zwiebel bis zum Scheitel.

Die wisse nämlich ganz genau,

wie hübsch se sin un mache Schau,

des sin die „Gröschte von drei Glocke“ –

die kann net mol e Schneeflock schocke!

So Scheeheite do, Mannometer (!)

gebt’s selte – d‘ Rose blühe nämlich später.

 

Drum freut Euch an se, seid bereit

für die scheene Oschterzeit!

So manches Ei, ob weiß, ob bunt,

liggt do versteckt in seller Rund.

Sagt, weiß jetzt jemand, was i mein?

Ich sag’s Euch net, ich bin gemein. (?!)

Mit Buchstab 15 im Alphabet

fange se aa, au 14 geht…

Viel Spaß beim Rate, seid net dumm

und frogt emol beim Nachbar rum.

Bloß oin’s verrat i Euch ganz keck:

D‘ Herbschtzeitlose, die sin’s net!

3 Kommentare

  1. Angelika

    Hallo Petra,
    hosch me a animiert…d’gwisse Glegglen henn Schdurm glidde bei’mer…un neije Frooge sin uffgedaucht…

  2. Buddy Hills

    Bei demm Sauwedder kennd des nur d’Sonneblum sei?!

  3. Otto Arnold

    Hallo Petra,
    do geht mirs awwer schun gud, weil e bei dem Sauwedder blos e Glasscheib zwische mir un dem Wiesle heb. Do scheind awwer bei allene de Kalenner kabutgange zu sei so vor Oschdere. Alle sen jetzerd feschde am Bliehe, Forsühdie, Rotdorn, Weißdorn, Hasel, un nadierlich unnerum schun Hahnefies. Die scheene große Oschderglocke welle schun uffhehre mid bliehe, die weiße Narzisse sen desjohr garned kumme, un die Schneeglegglen hen sich widder verzoge, vielleicht weil se koin Schnee griegd hen.
    Mid dem Alfabehd hosch me faschd verwerrd wege dem jott, awwe es gebt jo zwaimol O fer Oschderglogge, un a mid Jott gehd N fer Narzisse.