29. Mai 2023

Pfingschtsege

Irmtraud Bernert

Kommentare

Pfingschtsege

Was Weihnachte un Oschtere isch, des wisse alle: mol regents Gschenklen, mol Schokladhase. Bei Pfingschte isch die Sach scho schwieriger. Alle wolle’s ausgedehnt feiere, weil mer debei Urlaubsdääg spare kann. Awwer uff die Frog, was se do oigentlich feiere, werds uff oimol still. Ebbes mit em heilige Goischt kommt vielleicht noch – un wenns hochkommt, dass der in de Biwwel durch e Taube simbolisiert werd. S’isch scho viele Johr her, awwer die folgende Pfingschtgschicht isch mer wirklich so bassiert:

Pfingschtmontag im ICE zwische Kassel un Frankfurt. Hinner mir liegt e kräftezehrende Tagung un im Stille hader ich mit dene Initiatore, dass so was ausgrechnet uff en Feierdag hat g’legt werre müsse! De Zug isch entsprechend voll un ich bin foh, dass e noch e freies Plätzle in eme Sechser- Abdoil gfunne heb. Ich hätts mer so net ausgsucht, weil lauter Mannsleut drin hogge – awwer an eme Dag wie heut kannsch net wählerisch sei.Ich geb zu, dass sich mei Unbehage au e bissle aus de Tatsach nährt, das des alles ziemlich dunkelhoorige Mannsbilder sen. In sellere Zeit ware islamischtische Anschläg an de Tagesordnung un do wersch halt, ob’d willsch odder net, von de Presse infiltriert. Ich bin net stolz druff, awwer mach de annerscht!

Die zwoi gegenüwwer sehe wirklich arg arabisch aus un flüschdere au so. Zwische sich hen se en große Kaddong stehe un jeder vun dene zwoi hat e Hand druff glegt. Sie wirke arg nervös, die zwoi! Immer widder dissle se uffgregt mitnanner un gugge sorgevoll uff die Schachtel. Bei mir geht derweil s’Kopfkino los. Jesses, was hen die bloß in dere Schachtel drin? Un warum sen die zwoi so angspannt? Klar, weil se wisse, was do drin isch! Ich dagege woiß des net un gnau des bringt me in Wallung. Do fangsch uff oimal a, mit allem zu rechne. Ich gugg die zwoi Kerle kriddisch a un lös en verbale Schlagabdausch zwische dene aus. Sie flüschdere heftig in ere gutturale Sproch un gugge immer widder nervös zu mir rüwwer.

Ich tu, wie wenne in meim Buch lese dät – un merk erscht hinnerher, dass es verkehrt rum in de Hand ghalte heb. Mei Gedanke gehe widder zum Inhalt von dere Kischt: d’letscht Woch isch irgendwo e Paketbomb hochgange – die werre doch net ausgrechnet an Pfingschte. Ich bin so in düschtere Gedanke versunke, dass e die Verännerung gar net glei merk: in dem Kaddong werds uff oimol lebendig. Do raschelts un scharrts un die zwoi werre ganz blass.Schließlich macht oiner de Deckel vun de Schachtel uff un raus guggt e kloins Köpfle-un des Köpfle ghört ere weiße Taub!!!

Jetzt hoggsch do sorgevoll in deim Abdoil un derweil reist de heilige Goischt im Zug mit, geht’s mer duch de Kopf un ich muss erleichtert grinse.Die zwoi gegenüwwer grinse au un wirke uff oimol gar nimmee bedrohlich. Wie ich aussteig, grüße se sogar freundlich.

Tja, manchmol wersch gsegnet, wenn’d am wenigschte mit rechensch – odder wenn’ds vielleicht am wenigschte verdiensch!

 

 

2 Kommentare

  1. Angelika

    E scheens Gschichtl, Irmtraud… un ’s iwwazeigt : aus’eme verkehrtrum liegende Buch zu lese, ka’ma gut noochvollzieh in so’re Situation…Mir wär’s do a so wie Dir gange … hedd bloß die Schbrooch vun denne Männer net so bezeichne kenne , weil i net waiß, was „guttural“ isch…