Peter Kraus un Elvis
Neilich im Fernsehe, do war beim Ringlstetter de Peter Kraus zu Gascht.
Scho übber achtzig Johr alt, immer noch rank un schlank wie domols,
gebbt immer noch Konzerte un hat sogar noch e neue CD uff de Markt
gebrocht. Alla Bonnör, des muss mer em lasse, obwohl der jo noch nie
mein Fall war. Was me abber schockiert hat, de Ringlstetter hat doch
tatsächlich de Peter Kraus als de ehemalige deutsche Elvis vorgschtellt.
Peter Kraus un deutscher Elvis! Do isch mer schiergar ‘s Weinglas aus
de Hand gfalle. Domols hat’s nur ainen gebbe, der von uns als deutscher
Elvis akzeptiert worre isch. Un des war de Ted Herold. Die 45er Schall-
platt mit derre scheene Ballad “Moonlight” habbe heit noch. Nur der hat
die Lieder vom Elvis uff Deutsch gsunge, net de Peter Kraus, der domols
für uns de Schwarm von allene Pipimeedle war. Ich kann me nur an ain
Elvissong vonem erinnere, an ”Tutti Frutti”. Do habbe Gänsehaut kriegt.
Simmer doch mol ehrlich, de Peter Kraus war en Schlagersänger, abber
doch nie en Rock’n’Roller.
…. abber des musse jetzt a ganz ehrlich zugebbe, seit derre Sendung
habbe vom Peter Kraus e besseres Mainung.
29. Oktober 2022
Peter Kraus un Elvis
Jürgen Friese
Kommentare
So mancher Künschtler unner Vertrag kann ned ubedingt des mache, fier was er schwärmt.Un so entstand des überaus erfolgreiche Genre Deutscher Schlager, was än Aläustellungsmerkmal isch.