panta rhei
Heraklit isch koin neier Bauschdoff, wie mer moine kennt, sondern en berihmder alder Grieche. Dem sein weiser Ausschbruch isch bis heit im Gedächtnis vun de Velger iwerlifferd worre. Panta Rhei haist uff deitsch,“alles fließt“.
Weil: “nermerds kann zwaimol in denselwe Fluß schdeige, weil alles fließd un nix bleibd.“
Dass des immer schdimmt, kann jo jeder bei sich un seinere Umgebung leichd feschdschdelle. Mannichsmol geht’s langsam, awwer manichsmol ah ratzfatz.
Un es hehrt scheinz a faschd net uff, sogar die Hoor und Nägel solle noch em Dod noch weiderwachse.
Wammer die Verännerunge vom Neandertaler zum Homo sapiens bedracht, dann sin die arg langsam gange, des hod vielleicht gar nermerts gmerkt, die hen jo domols sicher noch koine Zeidunge ghat mid Schurnalischde, wo iwwer alles schreiwe, was se so bemerge oder aa ned.
Letschd hewe mol glese, dass Gscheitheid zum Iwwerlewe arg wichdig wär, un de Neandertaler hed ewe aa des kloinere Hern ghad. Mer kennt awwer aa moine, dass des gressere Hern vum Sapiens sich ännerd. Es scheint doch so, dass die Menschhaid immer dimmer wird un garnemme merkd, wenn se sich ausrott.
Warum aigentlich braucht de Nobelpreis drei Johr bis er merkt, dass Wisseschaftler ebbes grundlegend wichdiches erforschd hen? Oder warum wird mer Friedensnobelpreisträger so schnell, dass mer se kaum kennt, un wenn se de Preis henn, schdaunt mer grad, was ze dann dreiwe.
Des griegd mer alles net so richdich mit, mit de Mensche un aa net mid de Naduhr, die isch aa fer de menschliche Gaischd zu langsam um se zu begreife.
Viele moine, do gengd alles mid dem Inschdingkt, aber mer merrkd schun efders aa mol, dass die Viecher aa denke. Wenn Hund un Katz sich verdrage un aa noch en Mensch dezu akzeptiere, dann missese mid Dengke den Inschdingkt ausgrenzt hoh.
Do frogd mer sich schun mol, warum de denkfähige Mensch net zu sowas in de Lage isch.
Des mid dem technische Umfeld ging do viel rasander. Do hots schun Zeidunge gewe, wie mer die erschde Dampfmaschine in de Fabrigge laafe glost hod.
Zum Personeverkehr ware noch Geil im Eisatz, un fer die Gieder wars de Oxekarre.
Dann hod de Benz en Modor erfunne, den Benzmodor, un weil der so wichtich war, aa noch glei des Benzin. Weil die Oxe inzwische viel zu langsam ware, werre se blos noch gmäschd un als Schdiek verwendt.
Immerhin sin die Oxe- un Geilgschbanne immer am Hof glandt, aa wenn de Kutscher gschloofe hod. Die Kutscher hen sogar e Sitzart beherrschd, wo se beim Schloofe net fum Bock gfalle sen. Beim Audo klabbd des awwer noh net.
Nadierlich hot mer des Audo weiderentwiggeld, un des isch viel schneller gange als
bei de Leit.
Wenn dei Audo mol die Kränk hod, dann fahrsch ind Werkschdadd. Nord kummd de Audodokter mid seim Kefferle, paggd sei Kablen aus un schdeggd se in deim Audo an en Schdegger. Uf seim Skrihn kann er dann ablese, was net schdimmd un was er rebariere muss. Des werd dann reparierd un du kansch widder abraise.
Bei dir isch des annerschd. Vun wege Schdegger!
Do wersch mid Glibber eigschmierd un ohgschdepseld, de Arm gepressd zum Blutdruckmesse, e Ader gepiekst zum Blutentnemme, de Finge gepiekst fer de Zucker un so weider, nadierlich noch Abschdriche fer die Covid.
Dann musch hald uf de Befund warde, un wenn se nix finne, sage se, du wärsch gsund.
Annere sage, wer moind, er sei gsund, der isch blos no net richtich unnersuchd worre.
Gsunde un Kranke, alle welle se alt werre, des isch nadierlich unnerschiedlich, manche sin schun mid Verzich ald.
Die Schurnalischde froge als die an Johre eldere, wie se des gmachd hen, un so erfahre ses dann aa. De Rommel vun Schdurgerd hot gmoint, des Aldwerre isch ganz oifach, du derfsch blos net vorher schterwe. Annere sage aa, dass mer am beschde ald wird, wenn mer meglich viel aigene Gebortsdäg feierd.
Un wenn der mih froged, wie des gehd…….
Nix so ernschd nemme, wies isch, un dann des Richdiche duh, aa wanns verkehrt isch. Un dann hald nochemol des Richdiche duh, bisses Klappd.
Des dauert maischdens immer recht lang, un dann kannsch ald werre debei.
So, jetz wisseder des aa.

OA1022