De Zornniggel isch vorm Niggolaus g’stande.
De kläu Zorniggel hat widda ä Wut g’hätt.
In äum Fort hodda gebrüllt:
„Ich will Dambedei! Ä Dambedei!“
Sagt de Niggolaus:
„Kläuner! Beruhig dich doch!“
Awwer de Zornniggel:
„Ich will Dambedei! Ä Dambedei
Die Elt’re hän bloß geglotzt. An de Wand: Adventskalender?
Alle Türle sin scho offe g’stande! Uf äun Schlag leer g‘fresse.
Und de Zorniggel:
„Ich will Dambedei! Ä Dambedei
Do hat de Niggolaus sei rote Zipfelkapp vom Kopp gezoge,
hat de weiße Bart , ma könnt glaawe, middem Blutdruck von Hunnert Achtzig
aus‘m Gsiecht gezerrt.
Do war’s de Herr Meininger aus de Salzbrezelstroß!
Un jetzat hodder en Brüller losg’lasst:
„Halt jetzat endlich dei Gosch, du Zorniggel!“
Do hat de Bu ganz still g’halte un g’staunt.
De Herr Meininger hod sich widda de Bart ins G’siecht g’hängt.
Er hod sei Zipfelkapp ufgezoge.
Do warer widda de Niggolaus.
Und mal lernt do drauß:
Wenn ma alse mol sei wahres G’siecht zeigt,
laafts besser.