Mid mei’m Mann gibt’s oft Ärger, wenner mid de Öffentlichkeit z’samme remple dud. Er isch oft de Verursacher, obber will odder ned. Kannsch middem in äm Reschtaurant am Meer hocke, odder er kommt mid denne uf Friday For Future z’samme. Odder ihm isch mei Küch‘ übberlasse! Ich bin ä Ehefrau, die sich übber nix mehr wundere sollt. Jetzat häb ich mir de rechte Knechel unne am Fuß verstaucht. Es had arig weh g’macht. Ich konnt gar nimmer laufe. Und geschtern Owed war Elt’re Owed in de Klass‘ von unserer Kläu, Ich häb‘ ned uhbedingt ä guds G’fiehl g’hätt. Abber ich häb zum Meininger g’sagt: „ Du musch do no. Schreib alles uf, es isch wichtig fier ihr Schuljoahr.“ Als Vadder musser jetzat äufach au mol Verantwordung ibbernemme. Es isch Not-am-Mann! Er fahrt middem Rädle. Jetzat war er abber uf sellere gleiche Schul‘ wie heit unser Dochter isch. Und de Zufall wills: Die Lehrerin, die er z’letscht g’hatte hat, war domols ä noch junge Lehrerin. Heit war’se als Lehererin kurz vor de Rente und ebbe d’Lehrererin von unsere Dochter. Wie de Meininger in des Klassezimmer nei dabbt, ischer noch bei de erschte. Er denkt sich, do sieht jo alles noch so aus wie frieher. Bei uns war des alles emol nei und modern. Abber do siehts ä bissle nunner gekomme aus. Sogar er, de Meininger, had scho mit’kriegt, dasses in de Schule käu Geld gibt zum Inschtandsetze. De Herr Meininger hoggt sich an de selbe Platz, wo er frieher als Fuffzeh’jähriger g’hockt isch. In de Realschul! Immerhin! D’Eltre komme nach e nanner nei. Die äu oder annere kennter, weil mid denne warer au in de Schul odder im Veräu. Dann betritt sei alde Lehrerin s’Klassezimmer. Er had jo g’wisst, dasses sei alde Lehrerin isch. Abber jetzat, wo er se sieht, musser doch dreimol nagugge, obber se erkennt. Die Lehrerin begrießt also die Elt’re. De Meininger hat nix midg’nomme, dasser ebbes ufschreibe gekennt hätt. Die Lehrerin verzählt, dass es fier sie wichtig wär, dass die Kinner ihr Hausuffgabe mache. Sie däd jo wisse, dass die Klass‘ ziemlich groß isch. Grad desdewege wär’s wichtig, dass die Schüler sich nachmiddags nochemol mid dem Stoff aussenander setze sollte, vor demm se am vormiddag g’hockt sin. Dem Herr Meininger fällt uf: an seim Tischpfoschte isch obbe noch selle Gummikapp. Des war scho immer so e uhnödige Abdeckung für so än damals hoch moderne Schuldisch, mid runde Onyx Tischfüß. Ä völlig ungeeignedes Schulmöbiliar! Aber de neuschte Schrei, domols in de End Achtziger. Wie die Lehrerin weider schwätze dud, erkennter noch ganz genau die kläune Stell, wo er mid‘m Taschemesser die Kapp hat abhebe kenne. Und wo er selles Taschemesser immer noch bei sich tragt, holters aus’m Sack und blitzschnell hädder die Abdeckung g’lupft. Er staunt! Er isch glicklich wie en Schneekeenig. In dem Versteck hängt immer noch sei kläuns rodes Gummi und zwäu Babier Krambe als Munition. Er wäuß sofort: zwäu Schüss hadder. Die Lehrerin verzählt grad ebbes von….sie fänds dodalhl schee, dass irgend en Achmed und noch ebber von denne, so gude Leischtunge in de Realschul bringe däde. Do hadder scho de Schießgummi g’schickt zwische Daume und Zeigefinger g’spannt. De Krambe, also ä kläuns Babierle, z’samme g’rollt, in de Lapp nass g’macht und geknickt…..er dud de Krambe unner de Schulbank ins Gummi eihenke. Wer soll sei Ziel sei? Die Rita, die dumm‘ Nuß? Übberlegter. Die hat de Rainer g’heiradet un glaub immer noch, sie wär ebbes besseres. Er kriegt noch mid, wie die Lehrerin ebbes von Kunschtprojekte und große Gummibärle aus Beddong gegosse….mid Gräffiddi verziert, verzählt, zum Verkaufe zum Klassekass‘ uff zum fülle,….do schießter de Krambe ab. De Krampe trefft die Rita. Plattschuß dodahl an de Hals. Ihr Kopf zuckt und ihr Brill rutsch bis ans End von ihre spitzige Nas‘ nunner. Und wo se doch kurze Hoar hat, pfezt des au. Do rufts’se laut: „Aua!“ Wie frieher! Dass d’Lehrerin des au jaa midkriege soll! D‘ Lehrerin guggt ä bissle verwirrt, find abber glei widder ins Thema z’rück. De Meininger kriegt mehr oder weniger Null mid, wass’se verzählt und informiert. Weil: jetzat hadder noch äun Schuß frei. Widder legter de Krambe in Anschlag. Er nemmt sich zur Abwechslung de Klaus ins Visier. Dem sei Bagge sin immer noch so dick und rot, dasse e gudes Ziel abgebbe. Er had normal nix middem Klaus zu due, heitzudag. Er isch en Ökobauer und Pazifischt. do werds au käun Ärger gebbe. Übberlegt de Meininger. In demm Moment, wo er abschieße will, steht die Lehrerin voll hinnerm Klaus, in äunere Ziel Linie, kennt ma formuliere. Sie guggt plötzlich demm erwachsene Vadder Meininger tief in die Auge. Der sieht bloß noch, dass ihr Gosch sich zu’em echde Wolfsmaul verännert. Die Gummispannung isch abber scho komplett ang’legt. Daume und Zeigefinger sin‘ scho im Krambe Loslösungsprozess inbegriffe. De Krambe trefft die Lehrerin genau in ihr Wolfsg’sicht nei. Sie zuckt! Alle gugge verwundert und hännt Gosche uf. D‘Lehrerin sagt leis‘ aber scharf: „Meininger! Raus“! Herr Meininger steht uf, grad so wie als Schulbubb. Er kennt jo des „Meininger! Raus“! Er dabbt zu de Tür. Sei Gummile steckter in de Hossesack. Und wie er grad die Düür hinder sich zu mache will, hörter die Lehrerin zu de andere Elt’re sage: „De Meininger war scho früher so en kläune Extremischt. Er bräucht noch ä bissle Zeit zum Nachreife‘ bevor er noch ganz in de Amok laufe dud!“ Die Rita hörter kreische: „De Verfassungsschutz müsstmer informiere“!
Um Neune isch de Meininger häum gekomme. „Du bisch jo scho früh do“. Sag ich. Un er: “S’ging schnell“. „ Was henner b’sproche“? Erkundig‘ ich mich. (D’Moni hat mir jo scho alles haarscharf ufs WhatsApp g’schribbe, weil se in seinere Näh‘ g’hockt isch. ) De Meininger bringt als Antwort: „Alles normal“! Er dabbt in d’Küch an de Kühlschrank. Hoffentlich kann unser Dochter heit gut schlofe, damit’se morge in derre Klass g’wappnet isch, denk‘ ich mir. In demm Moment hör ich, wie unser Dochter in ihr’m Zimmer en grelle Teenager Schrei loslasse dud. De Buschfunk isch also bei ihr uf’s Handy durch gedrunge. Wisset Se, liebe Leser, an wem des alles widder hänge bleibt? Ich glaub‘ Sie kennet sich’s denke: an derre arme Frau, die sich sowieso scho de Knechel so schwer verstaucht hat.
17. Mai 2023
Neies vom Herr Meininger
Buddy Hills
Kommentare
Drejmohl hawwich bimm Lähse gedängkd , ich wääß, wohs annegehd. Awwer jedesmohl isch die G’schichd inne annderi Richdung abgeböuwe. Un ich jehdes Mohl middeme digge Grinse hingerhäär. Dangkscheen ferr die Gelähjehähd.