Neieres aus em Lewe

Iwwers ledschde Verdeljohr zu sinniere,
brauch e me aigetlich net scheniere.
Vieles im Lewe hod mer noch ned ghad,
un dann finds oft ganz bletzlich schdad.
Do lebsch zammefort un fiehlsch de gut,
bis uf oimol alles nemme duhd.
De Doc seht aa net glicklich aus
un schaffd de glei ins Krankehaus.
Do schdelld mer feschd, was de so quäld
un es wird nochgfilld, was der do fehld.
Der mid de Sens hod ohgeklopfd,
doch ii bin vun de Schippe ghopfd.
Es ging ufwärts wies mit Fallpauschale gehd.
Do siehsch, wied Polidik de Mensch verschdehd.
De Reha Ohschluß hod geklabbd,
In Brackene henn se Platz noch ghad.
(Die Werbung isch zwar uhgsetzmäßich,
awwer des Haus isch schbitzemäßich)
Nooch ferzeh däg, du griegsch de nit,
bringd ergedwer den Covid mit.
Positiv geteschdet geht’s dann glei
noch Heilbronn in die ISO nei.
Zwai Woche lang in die ISO verlegd,
was ufbaut war, war widder weg.
Un bsunners hod me do beriehrd:
Vum Covid hebe garnix gschbierd.
E Woch Verlängerung in de Reha sot noch nitze,
Un dann gings hoim mit Rollador un Schditze.
Jetz bene ziemlich immobil.
Die Familie helft mer viel,
un a de Pflegedienst hot gude Leit,
wo mer sich ufs Dreffe frait.
Mir hadde immer Zwaibettzimmer,
es Zwaite war belegt aa immer.
De erschde Partner isch en deitscher Türk gewese.
Der konnd gud deitsch un war belesen.
Mid dem hewe frehlich diskudierd,
doch laider war der auskurierd.
Was dann kumme isch, des muss e so sage,
war ferd Komjunikeischen oifach e Plage.
Des war e geriatrische Rehaklinik, un es war klar,
dass de Paziendeschdamm iwwer achzich Johr war.
Mit dene war kaum was zum schwätze,
Un wenn, dann blos in aigediehmliche Sätze.
Ii hed nie glaabd, dass des Maischder-Sleif-Denke noch so heftich
in dene Herner vun frieher verankert isch.
Die Schweschdere ware immer fraindlich un hilfsberaid .
Des war en Lichdbligg in dere ganze Zeit.
Dene alde Paschas war vieles ned rechd.
Vor Fremdschäme ging mers manchmol faschd schlechd.
Jetz hoffe hald, dass gsunde Alte
sich ohschdändicher verhalde.
Jetz wisseder, was in dem Verdeljohr in meim Lewe
sich an Bsunnerem hod ergewe.
Des will e als vergange bedrachde,
un dann widder vieles vun Naiem bedrachde.

OA0422