8. Mai 2022

Muttertag

Otto Arnold

Kommentare

Muttertag
Seit mehner als Zehdaused Johr – un do kummts uf e paar Johr nuff oder runner net oh – solls de Mensch uf dere Erd gewe. Des wär e Entwigglung aus annere Wirbeltiere, di wo lewendiche Junge ufd Weld bringe un dann maischdens aa seuge.

Soviel mer waiss, henn die noch koine Schule khat un konnde deshalb aa net schreiwe. Erschd schbäder hen se versuchd, Bildlen in Schdoi zu maisle, blohs wie mer des hot ausschbreche kenne, waiss mer net. Awwer mer derf ohnemme, dass die kloine Bebis als erschdes so Laute wie MAH-MAH vun sich gewe hen.Un meglicherweis isch des dann de Rufname vun de Gebore- hawende worre.

Schun bei de alde Grieche un Remer hod mer bei de Gedder die Moddere als was bsunneres gsehe un genau so verehrt wie dene ihre Sehn un Dechder.

Schee wärs, wenn mer in de folgende Zeide was Gschriewenes hed finne kenne. War awwer net. Mir isch a ned klar, wie mer dann bei verschiedene Volksschdämm uf Mutter un ihre Abwandlunge kumme isch.
So hods dann ruhich weiderglobberd, bis es de Johannes Gudeberg mit seinere Druckmaschin meglich gmachd hot, druggde Texde mehner un schneller zu verbraide.
Awwer noch im achtzehnde Johrhunnerd hen die Leit Schwierichkaide mid em Lese un Schreiwe ghad. Do soll zum Beischbiel de alde Fritz mit seine Kriegsbeschädichde als Lehrer die erschde Schule fers Lese, Schreiwe un Rechne eigfiehrd ho.

Jetz awwer zrick zum Mudderdag.
Im nainzehnde Johrhunnerd hod sich in Amerka Uruh verbraided wege de domoliche Frauebolidig. Un a in Eiroba sin so Frauebewegunge entschdanne.

Erschd am 2. Mai 1907 hod die Christin Anna Marie Reeves Jarvis in Grafton,
Virginia,USA mid eme „Memorial Mothers Day Meeting“ die Mudderdaggsbewegung
Ins Lewe grufe.
Des werd bei uns un in viele annere Länder am zwaide Maisunndag gfeierd.
De Mudderdag isch bei uns koin gsetzlicher Feierdag. Den hod de „Verband Deutscher Blumengeschäftsinhaber“ eigfiehrd .Des Blumegschäfd am Mudderdag ich erheblich stärger als am Valentinsdag.
Die Fra Jarvis hot gege den Kommerz ohkämpfd un hod sogar de Mudderdag widder abschaffe welle.

Also, un jetz feiered mol schee.

OA0522

1 Kommentar

  1. Angelika

    Jo…’s Zammesei henn mer mol widder „gfeiert“ …wa’ma sich sunscht net so oft sieht, isch’s schee, mol widder fa e Weil zammezusitze zu kenne , zu verzehle un e Mahlzeit zamme eizunemme… ob mit odder ohne ein Blumschdrauß (vum Gäärtner) … grad egal , wann dann noch dezu grad Mudderdag war… erschtrecht …

    Antworten

Einen Kommentar abschicken

Deine E-Mail-Adresse wird nicht veröffentlicht.