„Mondkur in “Bad“ Neeret, de zwoide Ufguss“
Große Ufregung im Kurort in spe „Bad Neeret“. En alder „Zinkener“ isch bei de Brunne’bohrung uf seim Grundschdück im Diefgschdad uf e Quell gschdoße mit mineralhaldichem Wasser (Eise, Zink, Sulfat un so weider).
Gschäftsdüchdich, wie halt alle Neereder so sin, hat er in seinere Scheier glei die „Kurklinik Heil“ ei’grichded, um mit seinere Fraa Clementine eine schdreng uf’em Mondkalender beruhende „Mondkur“ mit verschiedenschde A’wendunge (z.B. als Trinkkur, Badekur odder Schlammkur mit Packunge vom Altrhei‘-Schlamm) a’zubiede.
Als Unnerschützung un „Mädle für Alles“ hat er den alde Hoiner engagiert, e echdes Neereder Original, der wo vom Gäscht abhole bis zu de Kurpackunge alles im Griff hat.
Die erschde Kurgäscht treffe a schon ei, alles so e bissle verschrobene Privatleit, denne wo für ihre Gsundhoit nix zu deier isch. Do gebts zum Beischbiel die Frau Anna-Amalia von Krayenhorst -ihr verblichener Gemahl Hans-Hubert war üwer en Schwippschwager dritten Grades direkt mit dem Koiser Wilhelm verwandt- un ihr Adoptivsohn Heinz-Rüdiger, un der erfolgreiche Unnernehmer (Kurzwaren en Gros un en Detail) Emil Bolle direkt aus de Hauptschdadt.
Um noch meh Werbung zu mache, will der Kurdirektor mit Unnerschützung von seinere Tochter Vanessa, die newebei a für des Fitnessprogramm von de Kurgäscht zuschdändich isch, kloine Werbespots für TikTok produziere. Außerdem hat er den KIT-Student Mike Gabler als „Wasserdirektor“ eigschdellt, der mit’ere chemische Analyse die gsundhoitsförderne Wirkung von seim Heilwasser beschdädiche soll.
Der Mike isch awer a de Bruder von de Vanessa ihrem Freind, der wo zur Zeit grad in Auschdralie e Auslands-Praktikum absolviert, un soll so e bissle uf die Vanessa ufbasse.
Un schon ischs bassiert: Der Heinz-Rüdiger bändelt bei’eme Tete-a-Tete vor de verschlossene Tür mit de Vanessa a, un de Mike versucht mit Unnerschdützung vom Hoiner die drohende Gefahr abzuwehre. Zumal sich die Frau Heil in Gedanke scho in Adelskroise sieht un ihre Vanessa zu de „Diana“ von Neeret mache will.
Ob des klappt un zu wellem Ergebnis die Analyse von dem Heilwasser kommt, wird am End von dem turbulente Schtück zur allgemoine Erheiterung ufg’löst.
Komme Se, lache Se, un duhn Se debei a noch ebbes Gutes, weil de Erlös von denne Ufführunge (Ei’tritts- un Bewirtungsgelder) wie immer vollschdändich un ohne Abzüg für soziale Ei’richdunge in Neureut zur Verfügung gschdellt wird.
Also, mir seh‘‘n uns dann am 15., 16. un 23. März im Gemoindehaus Nord.
Un wer net kommt isch selwer schuld!!!!
Hallo Roland,
sag uns bloß noch vorher, was en „alde Zinkener“ isch…(?)…haww i noch nie gheert…hot wahrscheins ebbes mit’m
Zink zu duh, odder ?
Danke, Angelika
Ja so was?! Do brauche ma jo nimmee nach Herrealb?! – Do freue ma uns scho druff!
Ach, do freu ich mich abber druff un bet‘ zum liebe Gott, dasse fit bin
un komme kann. En Obend voller Frohsinn, womer alle Sorge un
Schrecke in de Welt hinner sich lasse kann.
Danke für des große Gschenk‘
Zur Klarschdellung: En „alder Zinkener“, des isch en neereder Ei’geborener, wo em „Zinke“ wohnt. Der „Zinke“ isch en alder Ortsdoil von Neeret, die Verlängerung von de Neereder Haubtschdrohß in Richdung „Diefgschdad, am Rand vom Gardeberg.
Danke, Roland fa die Erklärung… bin i doch falsch glege…vor lauder „Eise, Zink un Sulfat…“
An’eme „Zinke“ zu wohne, kummt mer jetzt a widder bekannt vor un dann sagt mer a noch
zu manche Nase „Zinke“….odder ?