Er war heit irgendwie ä bissle müd. Sei Arbeitsplatz war heit Middag achzig Meder hoch. Uf äm Ausleger vom Strommascht, ischer in äm Hängsitz sicher ahg’harkt g’wäse. Än kläuner Voggel isch dauernd um ihn rum g’fladderd. Geschtern war er ja selber noch im Fliege g’wäse, Rückflug vom Urlaub nämlich. Noch äun Daag dohäum zu bleibe, wär besser g’wäse, dann wär er heid ned so schläfrig. Der Zustand zwische Wach und Schlaf isch irgendwie irreal…..
….Sein Nachtflug hat’n von Upsala übbers Lichtermeer von Stockholm g‘führt, dann übber die Metropole von Koppehaage in Dänemark, un weider, immer weider, ibber Hamburg, dann Hannover, späder Frankfurt und runner nach Karlsruh. Do isch er dann scho au ä bissle erschöpft ahgekomme. Abber den Schlenker nach Durmershaim hat‘er noch hie ‘kriegt. Un als er dann ausgiebig g’schlofe hat, isch er los, um sei Stammlokal uffzusuche. Ä klasse Restaurant, wo Esse un Trinke gleichermaße gut un reichlich sin. Die Luft war des Joahr b’sonnersch warm, so Goldener- Oktober-mäßig, do am Rhein. Uf alle Fäll wärmer als dohäum in Upsala, in Schwede.
Wie er ahgekomme isch, hat‘er glei die übliche Verdächtige getroffe, die Stammgäscht hald, wie immer. Er hat‘ se mit „Hey“! begrüßt, so wie mer sich in seinere skandinavische Heimat ebbe ‚Hallo‘ sagt. Abber ned lang rum g’schwätzt. Er hat’n Heißhunger g’hädd un än Durscht. Denne Kerle, der pletzlich nebbe ihm uffgetaucht isch, hat‘er ned gekennt. War so än breitschultrige Typ, aber gedrunge gebaud, de Kopf ä bissle stur nach vorne, zwische die Schuldre g’halde. Der sagt:
„Auslänner! Mach ä bissle Platz do“!
Un de Schwede erwidert poschtwendend:
„Wenn du dich ned so ins Esse neiwühle dätsch, dass d’Hälfte uff’m Bodde landet, wärs au ned schlecht.“ Un er erklärt in äm ruhige Ton weider: „
D’Sonneblumekernle sin des Jahr weggem Putin sei’m Amoklauf in de Urkraine wahnsinnig deier g’worde“.
„Was labersch du“? Hat de breidschuldige Kleiber g’nervt g’antworded.
„S‘ Rotkelche hadd recht“! Ruft de Spatz „Die Schwede sind ja sogar desswegge in die NADDO eigeträdde“!
De Fink had g’sagt: „ Jo Spatz! Wegge de Sonneblumekernle? Du hängsch zu oft bei de Mensche rum un guggsch zuviel Fernseh“.
„Die Spatze pfeife ‚s ja scho von de Dächer!“ Erwidert de Spatz. „Fier uns bedeudet des, dass mir froh sei kenne, wenn ibberhaupt noch ebber die Sonneblumekernle kaaft un uns ahbietet“.
„Was in dei’m Spatzeg’hirn rumgeht, will ich libber ned wisse“, ruft de breidschuldrige Kleiber. „Hier gibt’s immer Fudder. Baschta.“.
Hinne, uff äm Tannezwaig isch ä kläuns Blaumeisele Männle g’landet. Er guggt ribber, er isch gut druff un putzmunter. Im schönnschte Augeblick hat’n sich pletzlich, ruck-zuck, wie aus’m Nix, de Felix gekrallt. Er hat denn Voggel von demm Zwaigle nunnerg’risse, un ab mid ihm, durch die Büsch.
Alle Veggel fladdre weg.
„Die Scheirers hän ä neie Katz“, verzählt än Grünling, wie se alle wiedder z’rick am Fudderhaus g’hockt sin.
„Die sin ja au b’scheiert“, had de Gimpel, in seim rote Feder G‘wand kommentiert. Un sei Frau, ganz in grau, had g’sagt: „ Do seh ich schwarz! S’treibt sich alleweil immer meener Katzeg’sindel rum“.
Es landet dann pletzlich ä Blaumeise Mädle un fragt:
„Isch mei Mann scho do?“
„Näu“. Sagt de Kleiber.
Jetzat ischs Rotkehlche weg g’flooge, isch hoch, fascht bis zu de Wolke ,nuff g’stiege. S‘ hat nunner geguggt ufs Land, uf de Rhein, übber die weide Ebene bis hin zum…..Ohhh hat‘sen do g’schüddeld!!!!
Än riesegroße Schwarm Stare hat sei Flugbahn durchkreuzt. Sie hän laud g’sunge: Auf Ihr Brieder in die Palz….un ihr Ziel: Hei joo: die Traube vom Müller-Thurgau und Dornfelder.
„Bei Eich piepts wohl“! Hats Rotkehlche ihne hinnerher g’rufe, isch g’strauchelt, hat geguggt, wo isch obbe un unne , hat sei Gleichg’wicht g’sucht, , un hat’s bei de Landung uff äm hohe Vierhunnerddausend Volt Strommaschte widder g’funde. Wie er do g’landed isch, hockt vor ihm so än Freileitungsmonteur, der do obbe im Blaumann, un mid seim Gelbe Helm un graue Bart, an de Isolatore rumschafft. „ Do schau her!“ Sagt der Mann überrascht un erfreut, als er des Rotkelche vor sich entdeckt. Un beide beobachte und begutachte sich erschtmol.
Än Näbbel isch uffgekomme. Ma sieht nix mehr vom Bodde, nix mehr vom Kolleeg, käu Himmel, nix mehr rummenumm. In demm Grau: Nur noch der Voggel mid derre leuchtnd rote Bruscht un de Gelbe-Helm-Mensch, als wäre bloß noch die zwäu unnerschiedliche Kerle uf de Welt. De Mann streggt sei flache Hand aus. Un er glaubts ned! De Voggel hupft uf die Hand, un in derre große Hand im Handschuh hoggt der wie in äm Nescht. Un so hoch, obbe uf dem Strommaschte, in demm Nebbel, wärred se alleweil  beide so richtig müd. Die Auge fallet zu. De Mann spürt pletzlich, wie er fliegt. Er hebt ab von demm Strommascht und so segelter ibber Durmershäum, do um de Kirchturm rum. Un des Rotkehlche fladdert um ihn rummenum. Er lacht laut, un fliegt nunner bis zum Rhein un do Richtung Karlsruh, un ibber die Raffernerie un de Rhaihaafe. Er denkt sich bloß noch: dess isch Freiheid! Äufach Uhhglaublich!
De Monteur wacht abber widder uf, do obbe uf sei’m Strommascht, hoch ibberm Bodde. Der Voggel isch weg. Un er wäuß ned, was isch Wirklichkeit un wasch isch Traum. Hat er sich do obbe ä G’schicht ausgedenkt, odder war er än Teil vonnere G’schicht? S’had käuner g’merkt, dasser ä kläuns Middagschläfle g’macht hat. De Nebbel fangt ah, sich zu lichte. Des Schläfle war eher ä ganz kurzes g’wäse.  Abber de Monteur fühlt sich jetzat echt viel ausg’ruhter un bei klare Gedanke verschwindet die G’schicht mid demm Rotkelche un allem. Löst sich uf, wie de Nebbel um ihn rum. Er sagt zu sich selber: Du hasch jo än Voggel, odder werscht alt. Än Kaffee wär jetzat recht.