Vun drauß vun de Stroße kummi her,

Ich muss eich sage, nix weihnachtet mehr.

Iwerall un a uf de Berg un Heh

hawwi koi Fitzele Schnee mehr g‘seh.

Ich seh‘s blouß dropfe uf mei Regekutte:

iwerall gibt’s blouß Wassersutte.

Un drowe aus em Wolgemeer

Kummt blouß noch mehner Nasses her.

Un wie ich so blatsch durch Sutte un Schlomm,

ruft mi e leises Schdimmele an:

„Menschenkind“, ruft‘s, „jetzt mach awer schnell!

Fong o zu denke un rett‘ der dei Fell!

Die Pole fonge zu schmelze o,

De Klimawandel isch jetzat dro.

Alte un Junge solle sofort

ebbes du an jedem Ort,

fer Katastrophe abzuwende

un die Welt zu treue Hände

fer de Nochwuchs zu erhalte

un sie sorgsam zu verwalte.“

Ich sag druf: „Lieb‘s kloin‘s Weltgewisse,

Die Leit sind alli so gerisse.

Weder kimmert sie der Eisbär

Noch intressiert sie selles Eismeer.

Fliege luschdich durch die Welt,

Jeder wie‘s ehm grad so gfällt.“

„Hot er donn net gnung Verschdond?“

„O Letz, Uverschdond nemmt iwerhond.

Zwar gibt‘s  die Umweltkonferenze,

elloi die schlimme Konsequenze

Muss die Menschheit selwer trage,

wie werd’s mol werre muss ma sich froge.“

„Ja sag mol blouß, wie ich des find?

Reiß dich mol zomme, Menschenskind!

Guck endlich zu, dass mol die Erd

Zu deinem Wohl gerettet werd.“