Entschuldigt bitte, dass ich grad stör‘, abber es hod en kläune Uhfall gegäbbe. De Meininger isch middem Rädle g’stürzt. Es war in de Beethove Stroß. Do, wo des dabbige Loch im Asphalt isch, vis-a-vis vom Cafe Hennig. Er isch na‘geplotzt un wahrscheinlich glei uf de Kopp g’falle. Er hod käun Helm uffg’hätt, weil seller, den’er emol g’schenkt ‘kriegt hädd, war’em immer zu kläu , wie’er als lamendiert, wenner druff ahg’sproche werd. Glei‘ sin ä paar Leit ahgerennt gekomme, wo se de Meininger hän uf’m Gehsteig liege g’sähne.  „Ruf mol äuner de Krankewaage:“ Hod ma ebber sage g’heert. De Meininger hod sich nimmer g’rührt. Er war ned ahsprechbar, hod neddemol uf Baggewatsche reagiert. „Legen mol ebber in d’stabile Seidelaag!“ Hod ma ebber sage g’heert. Awwer! Un jetzat kommt’s: De Meininger hod sich selberscht uf de Stroß liege g’sähne. Un die Leit ummenum stehe. Er hädd so gern nochemol sei Fraa g’sähne. Awwer er war jetzat ganz alläu in demm seltsame Zustand.. Do isch dann des helle, des uhbegreifliche, Licht gekomme. So hell! Und ned von derre Welt! Uhglaublich schee, dasser ä Wärme im Herz verspürt häd. Des Licht isch förmlich in ihn selberscht eig’schwebt un er wurd‘ ,wie von Engelen g’hoobe,  in des Licht neigetrage. Un dann hodder sich an em Ufer von em See widder vorg’funde. De Himmel war dort blau un weiße Schwän sin üwwers Wasser drüwwer g’fladdert.  De Meininger hod bloß noch g’staunt! Seller See war kreisrund. Und üwwer de ganze See, middig drübber g’spannt: a Rundboge Brück. Un de Meininger hod gedenkt, so ebbes findsch uf de ganze Welt ned. Des isch ä universelle Form! Himmlisch! Do hodder sei Hemd ausgezoge, und wollt Hosse ah no‘ ausziehe, weil , er hat nei springe g’wellt un ä bissle schwimme. „Unnersteh dich, Meininger!“ Ischplötzlich üwwer ihm ä mächtige Stimm erklunge Do hodder sich umgedreht, und en Mann isch owwerhalb vom Ufer g‘stanne. Der hat so ebbes Wohlbekanntes un Vertrautes g’hätt ,un hod de Meininger in ä G’fühl nei versetzt, wie wenner widder än ganz junge Bu g’wäse wär. Do ischem ganz warm ums Herz g’worde, als wenn ä große Glücksdusch uf ihn ei‘ regne däd. „Ich wollt nur ä bissle in demm See schwimme.“ Hod de Meininger  g’sagt, un hod sich so ebbes von frisch-frehlich g’fiehlt. „Des isch käun See, du Bachel, des isch en Äumer!“ Hod ihn jetzat seller Mann uf ä irgendwie tief vertraude Art ufgeklärt. Un‘ wie‘er  middem Finger denn runde Boge von derre Brügg nachg’fahre isch, hodder g‘mäunt: „ Un sehsch do ned ned denne  Henkel?“ „Ach des isch gar käu Brück? Des soll än Henkel sei?“ Hod  de Meininger verwirrrt erwidert un‘ g‘rufe: „ Jetzat häb ich gedenkt, ma kommt in de Himmel odder in d’Höll , odder erscht in de Limbus .Un es bräucht ä Riese vazwiggte Logischtik? Un am End ischdo bloß en große Äumer???“ De Meininger war entsetzt. De Mann do obbe hod g’lacht un entgegnet: „Wie soll ma denn annerscht die Seele uffange, die do her falle?“ Do isch se aus’m Meininger nausgeplatzt, die Froge aller Froge: „Bisch du de Gott?“. „ Meininger!“ Heerder sei Name dröhnend  rufe. „Erkennsch mich ned von selwerscht?  Jetzat schaff dich häum! Du hasch hier nix verlore! Awwer au garnix!“ Do isch’s em Meininger uf äumal ganz annerscht g’worde. Grad isch die Erkenntnis aller Erkenntnisse in ihm hoch g’stigge, un scho‘ war’se widder weg. Weil: er isch ums Rumgugge widder uf‘m Gehsteig g’legge, direkt  vorm Café Hennig, in de Beethove‘ Stroß. De Meininger glotzt in ä dickes, uhrasiertes G’sicht nei, und er sieht die große Auge in de dreggige Brill vom Karl. „Bin ich ned dood?“ Hodder g’fragt. „Näu!“ De Karl hod g’lacht. „Du bisch jo bloß middem Rädle na geplotzt. Bloß än kläune Uhfall. Mehr net.“ De Meininger war doodeblass un hod käu Wörtle raus kriegt.  „Vielleicht sollte mir erscht mol im Cafe Hennig än Schnaps drinke.“ Hod de Karl vorg’schlage.  Alla. Kurz druff sin‘ se an de Thek‘ g’stanne  un hänn ä Gläsle gezwitschert. Ma hod emol drauße ä Blaulicht vorbei fahre g’sähne, un‘ wahrscheinlich hod de Krankewage käuner uf m Bodde ligge g’funne, un isch widder häum g’fahre.  De Meininger hod awwer‘ widder sei Sproch g‘funne: „ Ich häb ä Nahtod Erfahrung g’hätt, Kalle!“ Alle im Cafe Hennig sin‘ still g’worde. Doodestille!  Bis de Karl des Schweige beendet hod „Hasch au glei middem Deifel dei Bekanntschaft mache kenne?“ Hodder sich erkundigt un‘ gegrinst.   „ Mir werds erscht jetzat richtig klar…“ versucht de Meininger sei Erlebnis zu sortiere.  „Awwer wen ich do getroffe häb? Kalle, des war ned de Deifel, aber au ned de Liebe Gott. Des war unser alder Klasselehrer, de Eugen  Rupser!“     „De Rupser!“ Hod de Karl scho vor Vergniege g‘jubelt un‘ beim Hennig noch zwäu Schnäpsle g‘ordert. „ Uf denne kenne mir drinke, der isch jo au nimmer uf derre Welt. Noch garned so lang her, wo’er g’storwe isch. Gott sei seinere Oberlehrer-Seel gnädig. Proscht.“  „Oh!“ War  de Meininger ganz betroffe. „ Awwer warum de Gott grad de Rupser g’schickt hätt? Vor demm hän mir ja scho au schwer Reschspekt g’hätt.“ Wie’se ihr leere Gläslen  abg’stellt hän, hod de Karl doziert: „Jetztat stell dir emol vor, de Gott selber wär gekomme. Wenn’d vorm Rupser scho Respekt g’hatte häsch, dann hättsch vorm Gott persönlich mindeschtens Zwäuhundert Millione mal mehr Reschpekt hawwe müsse.“ „Des hält jo kai Sau aus.“ Hod de Meininger eig’wendet un‘ vorg’schlage: „Awwer mir kenne noch äuner uf denne Schock  trinke.“  Un do hod  de Meininger noch e mol zwäu Gläslen b’stellt. …. Liebe Leser, ich bitt Eich! Nemmt selle Nahtod Erfahrung jetzat ned als Läschterung odder Blasphemie uf. Ich häb ja nur wiedergegäbbe, was de Meininger im Cafe Hennig verzählt hätt. Okay, es wared ä paar  Schnäpsle im Spiel. Ich war jo au debei, in sellere Situation, im Cafe Hennig. Un‘ mir, die ahwesend wared,  hänn uns fascht scho g’fiehlt wie die Jünger vom Jesus. So wie de Meininger druff war. Abber nur fascht! Uff alle Fäll: Später hodd’n dann sei Fraa abg’holt. Sie war ziemlich b’sorgt, weil ihr Meininger  hald so ebbes von ufgedreht war. Un weiler au  immer g’sagt hätt, dasser noch lang ned im Äumer wär! Noch beim Nausg’fiehrtwerde, am Arm von de Fraa Meininger, hodder g’rufe: „Ich bin noch lang ned im Äumer!“ Sei aus de Welt g’fallenes Dreigang – Schaltungs – Fahrrädle häb ich dann persönlich in mei Audo nei g’hobe, un seinere Fraa späder in de  Hof abg‘stellt.  . „Wie geht’sem?“ Häb ich mich bei de Fraa Meininger  erkundigt. „ Wenn än Dokter‘ komme wär, wär‘s besser g’wäse, als jetzat grad de Kalle“.  Had’se g‘sagt. „ Awwer jetzat,“ hat’se g‘mäunt, „ schlofder wie ä kläuns Bäbie“. Un‘ sie hod wiederholt: „Wie ä uhschuldig’s Bäbie.“