lernen
Es isch schun efder bassierd, dass me mei Kinner un Enkel frogd hen; wo waisch en des her?
I bin innere Zeit ufgwaxe, wo es no net soviele Medie gewe hod, wo mer was hod lerne kenne. Gud, Matthe un Physik ware als Nadurwisseschafde oinichermasse neitral. Wichdich ware fer mich die Biecher in meim Vadder seim Biecherschrank.
Vor allem in de hinnere Rai sin so Biecher gschdanne mid annere Ohsichde, als wie die gängiche. Awwer aa die vorder Rai war gud. Un vor allem fer en neigieriche Bu
ware do 24 Bänd großer Maier. Do konntsch oifach sche schmeekere.
Un do isch scheints bei mir e Kranket ausbroche, dasse alles heb lese misse, was grad zum lese war, un i heb me keschdlich amüsierd iwwer die Leit, wo mid eme schräge Hals un Kopf an de Blakatseil gschdanne sin, weil ebbes schräg druckd war.
Die Kranket isch aa bliewe. Mei schbädere Schefs hen des a gwisst un oiner hod emol gsagd, wie ne vor seim Schreibdisch gschdanne bin: Sitze se no, sie brauche die Brief do ned zu lese. Oins war on de domoliche Schul gud: Mer hod wege dene Ohforderunge dreifachs Multitasking glernd. (Des kann e heit nemme).
Im Beruf hewe alle Randgebiede mitgnumme, un des war domols ned oifach ohne Compuder.
Awwer i wolld uf was anneres naus: I wais jetzerd nadierlich en Haufe Zeig, wo e nie meh brauch (Hegschdens es frogt mol ebber denoch, des lossd awwer noch.)
Wenn mer des betracht, was mer heit wisse muss, dann hen die Lehreirichdunge grad gnug zu duh, aigentlich meh, als se kenne. In de Berufe schderwe alde Technike aus un a die, wo des noch kennt hen, sin weg un laaider passe do die analoge Zeitablaif oft net zamme. Mit dem, was e fer die Moischderbriefung wisse gmist heb, däte heit koi Facharbaiterbriefung meh bschdehe, awwer annerschdrum wärs ähnlich. Gud, dass es die Computer gebd, do muss mer hald awer wisse, wos schdeht, genau wie bei de Biecher.
Also heiled net, wenn eier Kinner wenicher oder vielleichd blos was anneres lerne als ihr, es isch trotzdem en Haufe Zeich. Un wenn mol was Aldes widder gfrogt isch, sinn noch immer gnug eldere Fachleit am Lewe, die mer froge kann.

OA0522