27. Februar 2023

Kein Weg z’rück

Buddy Hills

Kommentare

Sie hätts ned gedacht. Des war ja uhmeeglich hoch. Ä brudale Angschtwell fährt ihr voll durch de Mage. Aber sie had ä Entscheidung getroffe, hatse sich g’sagt. Sie hat die Entscheidung getroffe, un sie wollt kai Zurück. Aber sellen Sprung, sellen verdammte, allerainzigschteSprung! In Gedanke geht’s schnell, aber wenn ma dann da obbe steht? Gäbs noch ä Chance, widder zurückzutrete? Abba wie solls denn dann weidergehe? Näu. Kai Zurück. Viel zu lang geht die Angscht mit ihr um. Jedes Mal kommt’se wieder für neu, die Angscht. Die sitzt so tief! Die dud alles verderbe. Ma redd zwar als uf se ei. Aber des Redde hilft ja nix. Sie hat sich entschlosse. Ich spring heit! Sie macht Schluss mit derre Angscht. Was ihr Eltre dann wohl denke? Ihr war klar. Sie isch die ainzigschte Tochter, s‘ ainzige Kind. Und des steht jetzat da obbe. Pletzlich fiehlt se sich uhmeglich einsam. Sie had in de Augewinkele die Leit g’sähne. Na und? Was hatse mit denne zu due? Nix!! Aber wie länger se da obbe zaudert, machtse doch ä paar Leit uf sich uffmerksam. Oh! Zu demm Sprung brauchts halt au soviel Mut. Un wo doch die Angscht alles diktiert. Un schlimmer noch. Sie kriegt des G’fiehl, dass grad jetzat immer mehr Leit zu ihr nuff gugge. Ja! Do hännse glei ä Sensation! Ja,ja, ihr wardet jetzt bloß druff, denkt se sich. Dann hänner wass zu verzähle. Un wie länger sie mit ihrer Angst zum Abhebe, zum alles loslasse in derre Welt, kämpft, umso mehr hatses G’fiehl , daß bei denne Zuschauer Uhgeduld uffkommt. Sie wellet alle die große Show sehe. Dasse springt, dasse tatsächlich springt. Und wie isch des dann, wennse do unne uf dem Staibode uffprallt? Vielleicht middem Kopf zuerscht? Oder die Fieß breche. Odder halt ganz uhg’schickt halt? Es kennt ja wirklich dodahl bleed komme, wegge irgend ebbes, was ma ned voraussehe kann? Dass se ebber schuckt? Sie dreht sich um. Kai Mensch hier obbe. Un jetzat siehtse pletzlich, ihr Mudder, ihr Vadder sin au da unne und gugge mid große Auge. O Gott! Ihr ainzige Tochter! Es fängt ebber a zu klatsche. Geht’s noch? Fragt se sich. In demm Moment wird die Sunn schwer vonnere dunkle Wolk verdeckt. O jee. Es isch Februar. Sie spürt ä Kälte, durch un durch. Es klatsche pletzlich noch mehr Leit! Sie wolle se tatsächlich sehe, wie se denn Sprung macht, un obbse des wirklich wage dud. Sie macht äun vorsichtige Schritt vor. Sie guggt, wie weit se mid de Fußspitze vor kann, ohne dass se ihr Gleich’gwicht verliert. Soll se sich aifach nach vorne kippe lasse und dann isch doch alles egal? Was denke die Eltern da unne? Kenne die denn mit äuner Tochter voller Angscht lebe? Die Wolk lasst de Sonn widder uf alles nunna scheine. Alles strahlt. Des isch de gude Moment. Sie denkt bloß noch: O lieber Gott, bleib bei mir! Und sie springt! Sie merkt den Fall garned so recht, weil es geht schnell. Kai Zurück mehr! Die Leit klatsche laut. Alle klatsche in demm Hallebad. Neun Jahr un drei Meter Brett! De Sprungturm isch widder frei! Die Kläu hats g’schafft! Die Mudder klatscht und lacht au. Un durch die große Glaswand lacht die Sunn un denkt sich wahrscheinlich: So ä mutiges Mädle! Sie glaubts selber kaum. Abber sie isch g’sprunge. Die Leit sinn alle gud druff.

0 Kommentare