Jetz gehds los
Jetz gehds los, henn se uns in Berlin die ganz Zeit schun verschbroche.
Un domid moine se, dass die viele Faxe in de Emder uffhere solle, es miesd alles
oifacher werre un des miesd dann alles digidal werre.
Was die Leit ned so rechd verschdehn, glaabe se hald oifach emol.
Mer mechd sich jo aa ned dauernd uffrege.
Awwer wann mer schun e Bissle ebbes midgriegt had, dann waiss mer aa,
dass mer nochher digidal blos no mied Oinser un Nulle zu duhn had.
Des isch uns aa bis jetzd iwwerhaubd net schwer gfalle, mir henn uns langsam dro
gwehne derfe.
Also in de Schul hemmer noch glernd, dass die Nulle koin Wert hen un blos dezu do
sen, dass se bei de Mathe Licke fille un aneme Platz schdehe bleiwe.
Des war, weil die Anna log, es gebd nähmlich schun arg viel vun dene Nulle.
De Schdaad hod en Haufe vun dene Nulle, un die verbrohdet er aa im große Schdiel,
oi Beischbiel fer verbrauchde Nulle sin die Schdaadsschulde, do schdehe hinner
dene zwaikommafinf elf (11) Nulle, die sin emol fort. De Flugblatz (BER) hod en
sexer mid Nei (9) Nulle verbrauchd un de schduhrgrder Bohhof en Oinser mid
Zeh (10) Nulle.
So kennde grad ewich weidermache bis runner zu dene kloinere Nullerpaketlen,
die wo die viele Schdähdle un Kommune alleweil verbrohde.
Also die Nulle fer die Digidalisierung kennd mer zammebringe, awwer die Oinser?
Ii heb emol so rumgfrogt bei de Leit, faschd alles Oinser. Des isch gud, kennt mer
moine, awwer die viel mehner Nulle, die wo mer aa fers Digidalisiere braucht, die sin
laider arg viel weider owwe verdaild, wo se dann dene liewe Oinser am Buggel
henge un bschdimme, wie se mechde, dass es laafd. Un die resiliende Nulle henn
jo, wenn se hersch, vor lauder Resilienze verlernd, dass se aa so schnell sotte
dengke kenne, wie se schwätze.
Awwer die viele Nulle werres wahrscheinz a des Mol widder geje die Oinser schaffe,
un mir alle derfe uns in de Emder weider iwwer dene ihre Faxe fraie

OA0823 (für GnitzerGriffel)