28. Dezember 2022

Invenduur

Irmtraud Bernert

Kommentare

Invenduur

Zwische Weihnachte un Dreikeenig sin d’Rauhnächt, in dene böse Geischter ihr Unwese treibe solle. Früher hat’s in dere Zeit awwer au e paar gute Geischter gewwe! Nämlich solche, die im Tante-Emma-Lade bei de Invenduur g’holfe hen.Immer am 28. Dezember hat sich mei Mudder in aller Herrgottsfrüh in en Kiddelschorz gschmisse, e Kopfdiechl uffgsetzt und isch zur Gerlind marschiert – so hat unser „Tante Emma“ g’hoiße. Der Lade war winzig, awwer vom Bode bis zur Deck vollgepflaschtert mit Regale, un die wiederum ware vollgstopft mit Schachtle, in dene man vom Backbulver bis zur Mausefall alles gfunne hat – nur garandiert net des, was’d im Moment grad gebraucht hättsch! Un all des Zeug hen se akribisch durchgezählt un uff ellelange Lischte gschriebe – un des ohne zu hinnerfroge wie des Gschäftsjohr war, odder ob d’Ladehüter üwwerhand nemme. Sie hen oifach nur feschtg’halte, was do isch, un ferddich!

Wenn mei Mudder obends mit eme staawiche Kopfdiechel un em steife Kreuz widder hoimkomme isch, hat se sich e Brot gschmiert, d’Füß uff en Küchsstuhl glegt un gmoint: “So, des Veschberle hewwe mer jetzt verdient!“ Un hat dabei so zufridde geguckt, wie selte im Johr.

Während de Rauhnächt isch im allgemeine au die Zeit von de Johresrückblicke: poliddische, gsellschaftliche, sportliche un au die ganz persönliche. Ich g’hör zu dene Leut, die in dere Zeit uffs vergangene Johr zurückblicke un manchmol rumhadere un sich froge, ob mers net besser hätt hinkriege könne. S’helft selte weiter! In dem Johr, so heb ich mir üwwerlegt, machs doch oifach emol wie bei de Invenduur im Tante- Emma- Lädle: net werte, net vorausplane – oifach nur feschthalte, was do isch un baschta!

Ich schnapp mir also en Kuli un e Schreibheft un leg los. Als erschtes kommt de Hausrat dra, des isch oifach. Mir sen jetzt in eme Alder, wo’d net stännich neue Möbl kaufsch – des sin konschtante Größe, do kommt im Johr net viel dezu. En Satz neue Handdiecher fer’s Bad muss uff’d Lischt –  so scheene, rote, kuschliche ….obwohl, wenne se so angugg: hätte die graue von Möwe net vielleicht doch besser gebasst? „Stopp!“ rufe me zur Ordnung. Net zweifle, net hinnerfroge – oifach nur uffschreiwe, was do isch!

Bei de Bücher werds scho schwieriger. Ich wühl me durchs Regal, dass d’Staubflocke nur so fliege. Vielleicht wär jetzt so e Kopfdiechel gar net schlecht gewese? Jesses, jetzt hasch den Wälzer von de Tante Agathe immer noch net g’lese!! Un wieso schenkt d’Annegret ausgrechent mir en Ratgeber üwwer’s Ausmischte ?!?!Mei innere Stimm bringt me widder uff de Pfad zurück: net nochdenke, oifach nur noddiere un baschta!

Mit em Lebensmiddelschrank in de Küch geht’s weiter. Do hewwe neulich erscht uffgräumt, des isch easy! Bloß: wo um alles in de Welt komme denn jetzt die Rosine her? E ganzes Pfund –  noch vier Woche haltbar un koin Mensch in unserer Familie will se esse. Herrje, was fang ich denn jetzt mit dene Dinger an?„Gar nix“, sagt mei innere Kontrollinschtanz – oifach uff de Block mit ene un gut isch!

Un so geht de ganze Morge rum mit Sichte, Zähle un Erfasse. Bei de abschtrakte Größe werds dann schwieriger! Zum Beischpiel wie viel beschte Freindinne? Fünfe odder doch nur viere? Kann mer d’Annegret oigentlich noch als beschte Freindin zähle? Die woiß doch immer alles besser un tät sich im Lewe net melde, wenne se net selwer anrufe tät!?! „Halt!“ hau ich d’Brems nei. Uffschreibe odder weglasse, awwer net rumhirne!

D’Gsundheit war net so doll im vergangene Johr – mindeschtens zwei neue Narbe könne uff d’Lischt. Hätt des jetzt wirklich sei müsse?!? „Lass gut sei!“ Net lamendiere – oifach nur uffschreibe. S’hen alle Leut welche!

Am späte Nochmiddag binne soweit durch. Ich setz me an de Küchedisch, leg mei Füß uffen Stuhl un lausch dem freundliche Gegurgel von de Kaffeemaschin. Den Kaffee hewwe mer jetzt ehrlich verdient! Vor mir liegt die Lischt von meinere Invenduur. „Alderle“, denk ich mir: “eigentlich bisch ganz schee reich!“Upps! Scho widder e Wertung ?! S’isch die oinzich, die ich mir heut unang’fochte durchgehe lass!

2 Kommentare

  1. Angelika

    Hallo Irmtraud,
    hab, bevor i Dei Mail beantwort hab, nix vun dem neije Blogbeidrag gwisst…awwa schun richdich gschriwwe, wann i do am End
    gmoant hedd, dass halt doch irgendwu e ganz „Schdarki“ bisch !

  2. Judith Rimmelspacher

    Domit habbe heut scho agfange, liebe Irmtraud, mit Ausmischte, mit Uffräume, mit Fege.
    Ich mein fascht. ’s isch Frühling, weil d’Sonn so schee gscheint hat un mein Kater uff
    sein Lieblingsplatz uffem Balkon gsesse isch un sich hat bescheine lasse.
    Jetz‘ habbe me ausgruht un mach‘ späder weider. Hab lache müsse, weile en alder Spruch von
    meim Sohn aus seine wilde Zeide in de Schatzkischt gfunne hab. Des Schild war an seiner Dür
    ghängt, er hat mer damals verbode, uffzuräume un irgendwie hatter recht:
    „Nur Verrückte halten Ordnung, das Genie beherrscht das Chaos“.

    Ich bin eigendlich froh, dasse noch e bissle Chaos in mer drin hab. Abber zur Beruhigung
    sage mer dann doch: Wer sei äußere Ordnung hat, hat a sei innere. Fröhliches Ausmischte,
    ich mach‘ des mit Musik, meischtens Elvis oder Oldies aus de 60er. Des beflügelt!!!!