Seit zwanzich Minudde hengge am Telefon
Des Lied wo se schbiele kenne scho Ton für Ton
Un immer widder: „Bitte warten, please hold the line“
Do wersch verrückt debei, ich finds gemein.

Refr.: Ich häng fescht in de Wardeschloif,
die ganz Zeit in de Wardeschloif,
heer immer bloß den selwe Schmus
un grieg de Wardeschloife-Blues.

Hör zum x-de Mol „Ihr Anliegen ist uns wichtich“,
ja dankschee, uf die Aussag do verzicht ich,
weil, ‘s isch jo doch bloß Gschwätz im Grund
un ich wart scho fascht e halwe Schdund.

Refr.: Ich häng fescht …

Langsam awer sicher platzt mer de Krage,
„ihr  elendiche Sauköpf“,  heere me sage,
des könne der doch mit mir net so mache
wenn ich eich verwisch hen der nix meh z‘ lache.

Refr.: Ich pfeif uf eier Wardeschloif,
warded nar bis ich eich dorch de Garde schloif
un zum Richter sag’e ich kann nix dezu
schuld war de Wardeschloife-Blues!!!    Oh yeah!!

(So, un do müssder eich jetzt grad noch em Simon sei Mussich dezu vorschdelle, dann werd’s recht)

Übrigens: Unser nägschder Alt-Neereder Schul Mundart-Owed (beroits de Zwanzichschd) isch am 7. November ab de Sechse im Gemoindehaus Nord in Neeret.
Un wer net kommt isch selwer schuld!