D’Lena-Marlen‘ ! Sie guggt ihn ah wie ä Honigkuche Pferd. Ach, isch’m des peinlich! De Großteil von seinere Persönlichkeit fahrt mit em Fahrstuhl bis zu de wagglige Knie nunna. Wie er jetzat so do steht, guggt se weg. Weil se sich jetzt vielleicht au schämt? Und do! Jetzat guggtse widder. Er hat hier üwwerhaupt nix zum Suche. Er isch voll falsch platziert. D‘Lena-Marlen‘, die basst do her, awwer er doch net! Un dann sowas von viele Leit hier. Ob‘n ebber sieht? Von seine Kumbels? Dann hädder dodahl verschisse. Dann kennter sich ja nirgends mehr bligge lasse. Die Mudda hadd‘n uhbedingt mitnehme müsse. Er had g’rufe: Näu! Un sie had g’sagt: S’geht schließlich um dich un um die Schul, un um die Zukunft! Von eirer ganze Generation! Wie Üwwerfall in sei Lebe, isch’sd ihm vorgekomme. Un jetzat stehter do. Sei Mudda had ihm ä Schild in’d Hand gedriggt. Ä braunes, Babbedeggelschild. Do steht druff: Inveschtiert in eier Kinner. Immer, wenner de Kaddong langsam senke dud, geht sie her un hebt sein Arm widder in d‘ Höh. Sie had au ä Schild in de Händ. Awwer ä weißes! Un noch viel greeßer. Do steht druff: Sondervermögen Schule: Sofort! So isch’se, die Mudda! Sie will immer alles sofort. Hausufgabe mache. Sofort. Zimmer ufraume? Sofort. Dreggäumer nunnabringe? Sofort. D‘Schule solle besser werre. Des bedeided in Wirklichkeit:  sie sin alle gegge Freistunde, wo se als hinne kicke kenne …un Bledsinn mache. Sie sind dagegge, dass die zwäu Sportstunde am Freitdag ausfalle un er früher häum kennt. Sie sin dagegge…,.ok, die Schul isch scho ä verranztes Haus. Wenn ma do än dumme Spruch an’d Wand schreibe dud, juckt’s käunen mehr. De Abbord isch voll s’Verregger Loch. Do hod sich mol ä Mädle in’d Hos‘ gerbrunzt, weil’se uf so ä ekliges Scheißheisl ned gehe wollt. Er selwer isch jo än Härdlinger. Er brunzt üwwerall. Un was isch jetzatd des? Do kommt ä Fernseh Team vom SWR ahgedabbt. D‘ Lena-Marlen‘ lächelt se scho ah. Und ihr Mudda macht sich bereit, oder sage mer, sie macht sich breit, um sich denne in de Weg zu stelle. S’gebbt b’stimmt ä Interview. Näu! Odder? Die halde doch ned uf ihn zu, die TV Leit. Er guggt sich entetzt um. Wo isch de Fluchtweg? Er spürt ä Hand. Die greift sei Hand. Sei Mudda ihr Hand klemmt seine fescht. Er macht ä ruckartige Befreiungsbewegung. Abber die Hand von de Mudda hält. Un jetzat : de Super GAU. Die Leit mache vor ihm Halt. Der middem Mikrofon, sagt zu de Mudda: Därf ich ä kläune Frog stelle, fier unser Landesschau. Ihr Sohn isch so drollig. Der soll ja au mol zu Wort komme bei dem Thema. Der gebbt ä guudes Bild ab. Ja, abber gerne, sagt die Mudder in äm fremdländische Hochdeitsch un ihr‘ gnadenlose Hand zieht ihn weiter vor ins Sichtfeld. Wie häußch denn du? Will der Reporter wisse. Warum jetzatt des? Wäusch, mir brauche die Vor un Zunahme. Mir müsse ja au darlege kenne, wer ebbes g’sagt hat. Sei Mudda dud de Name nadürlich scho verrade. Sie buchstabiert sogar. Un wie alt bisch? Erkundigt sich der Fernsehmann. Was? Scho zwelfe? Ruft der Typ, dasses jeder höre muss. Alle Leit von de Proteschaktion drehe sich her un‘ glotze. Alle! Sodelle. Sagter. Und jetzat brauche mir die Stellungsnahme. Grad äu Sätzle langt scho. Was willsch denn gern uns’re Zuschauer von de Landesschau als Botschaft üwwermittle? Wo du doch uf derre Protescht Aktion die Meinung von de Schüler/.. INNEN… so tapfer verdrehte dusch. Er antwordet bloß: käu Ahnung. D’Mudda sagt: Jetzat sagsch äufach: Mir hän ä Recht uf Bildung un Zukunft. Un do kannsch debei an de Europapark denke. Europapark, denkter. Des isch ä Ahgebot! Alla! Er sagt…..Stop! Ruft de Reporter. Und dann: Kamera ein! Jetzat häld der Kameramann mid demm Riese Kolloss uf ihn zu. D‘Mudda flüschtert: Mir hän ä Recht uf Bildung un Zukunft. Er stammelt: Mir hän recht uf Bildung…..Die Hand von de Mudda drüggt erbarmungslos zu. …un Zukunft. Super! Ruft de Reporter. Des hasch gut g’macht. Un zu seine Kollege sagter: un widda ab die Poscht. D‘ Lena- Marlen‘ isch scho ganz nah dra gekomme mit ihrer Mudda. Sie will ah ebbes sage. Awwer sie werre ignoriert. De Lena-Marlen‘ ihr Blick trifft ihn wie än tödliche Schuss. Die denkt sich b‘stimmt, der Seggel därf so ebbes im Fernseh sage, weiler sich vordrängelt, debei isch SIE Klassesprecherin! Europapark! Sagter zu de Mudda. Gell, lacht sei Mudda gnitz un frehlich, wenn ma an so ebbes denkt, wie de Europapark, dann fallt äum alles leicht. Un wann gehe mir do no? Erkundiger sich. Ha näu! Sollsch jo nur dra denke, häb ich g’sagt. Europapark isch ä bissle zu deier. Aha. Wird’s em klar. Voll neig’legt. Er üwwerlegt. Wer guggt denn scho’d Landesschau? Käu Sau von seine Kumbels guggt Landesschau. Des beruhigt ihn. Des beruhigt ihn bis zum näxschte Dag. Weil ….do sagt de Lehrer, alle sollet heit Owed mol die Landesschau ahgugge. Do sin mir drin! Käu Ahnung, wasser mid dem Wort „Mir“ mäunt. Awwer er legt noch zu, un nennt sein‘ Name, un verzählt dass er, von demm jo käuner so ebbes erwarded hätt, ä Interview gegebbe hat. Un dasser er, de stolze Lehrer, so em Engagement en sehr hohe Stellewert bei messt. De Nick un de Leon grinse. So ä G’siechtsfront rollt uf ihn zu! Sei Ruf isch für immer ruiniert. Er! Grad er! De Zwäutstärkschte von de Klass‘ Es wird ihm ganz heiß. Er had vor allene Leit g’sagt, er häd e Recht uf Bildung. Sei Zukunft? Fährts ihm ins Hirn…. Isch komplett futsch. Er isch im falsche Film, denkter sich. So schnell bisch rau aus de Helde Welt ! Un do hadder  nur noch äun äunziger letschte Wunsch. Unzwar: dass jetzat, in genau demm Moment nämlich, des ganze verlodderde Schulhaus üwwer ihne z’sammekracht. Un sei Mudda wär schuld.