Ich weiß net, ob i komm

un aa net, was i morge mach,

un was i uff em Konto hab,

macht mi aa net schwach.

Hab de Fade verlore,

de Blick für d‘ Ordnung.

De Tee, scho kalt in de halbe Tass,

en brauner Kern uff em Teller

vom Pfirsich vorhin,

noch nass. –

Wieviel Uhr?

Ich will’s gar net wisse,

häng zeitvergesse

in meine Kisse.

– Alltagsfruscht! –

Kei Luscht zu nix un niemand net,

orientierungslos,

belanglos,

zwanglos glücklich

zwische Couch un Bett.

Tut ma leid,

heut kannsch net mit ma rechne.

Was? Wo? –

Ich? Bin eigentlich gar net do.

Oh, was weiß ich,

dann mach i’s halt morge

vielleicht –

oder net,

ich mach ma kei Sorge.

Juchhu –

Huhu.

Du?!

Weisch was – lass ma einfach grad mei Ruh!

Nai, ich bin’s net,

glaab ma’s doch!

Mei Seel isch gegange,

mei Geischt hat aag’fange

sich uffzulöse.

Eifach so!

Des gibt’s!

Lach net! Laß mi do

vor mi hin

ebe grad noch bissel döse

in mei’m Chaos mittedrin.

Hey, guck net hin,

‘s gibt kei Problem,

un ich will’s net löse.

Ich bin’s heut net!

So glaub ma’s doch!

Des Telefon schellt trotzdem noch.

– Was soll’s!

Ich geh net hie,

lass grad bimmle.

Dreimol – achtmol!

Ihr liebe, bleede, dabbiche Leut,

ich bin net do – Punkt.

Schluss für heut!

Eikaufe?

Mensch, was soll i dort

beim Aldi jetzt,

ich geh net fort!

Ich will heut Obend aa nix esse,

muss denke,

schlofe,

mich entspanne,

des Jetzt genieße –

drauß müsst ma gieße,

un die Poscht –

weisch was? Des isch ma alles wurscht!

Stör i net,

war lang g’nug drauß,

außerhalb mei’m Schneckehaus.

Bleib ma fort,

böse Welt!

Ich mach nix meh,

geh nirgends hie –

un trotzdem

such i irgendwie

en Ort,

e Wort,

was war’s denn noch –

was ma so fehlt?

En Stern,

e Insel irgendwo im All,

e Burg, e Festung ohne Loch – ???

Jetzt hab i’s,

ich seh’s klar verschwomme:

Ich muss erscht mol widder

zu ma selber komme.

(Aus dem Buch „Wemma immer alles sage dät“, epubli)