24. März 2021

Houmschobbing

Thomas Heitlinger

Kommentare

Was mechsch wonnd nachds oifach ned schloofe konnsch? Guggsch Fernsee! Blooß waas? Des isch die Froog! Schaldsch uff Beaade Uuhse? Longweilich! Weil die Soffdpornos vum  Oswalt Kolle had ma joo schun en da Kindheid geglozzd un Heidi-Heida konne jeedn Daag hewwe, do brauche me nuur e paa Minudde vord Dier schdelle. Selbschd uffem Doorf geehn do Sache for sich, des glaabsch ned! Awwer do gehma jetzat ned weida ens Dedaii! Weil, was en da Nochbaschaffd bassierd, geehd niemond ebbes o! Alla bleiwe ma bei meina schlooflose Nechd, obwoohl Follmoond jo eerschd neggschd Woch isch! Heilicha Bimbom! Koammas also uff des aa ned schiewe… Seis wies isch! Zrigg zum Thema: iich ligg wach un iwwaleeg, was ma em Beschde glodze keend?? Awwer, ich heb die Ondword gfunna! „Houmschobbing is the answer“! E bessere Schdendab-Kommedie gebbds nerdlich fum Ägwadoor sicha ned! Un die Leid, wu do nachts leif em Fernseh iihre Uuweese dreiwe, brauche for denn gonze Keeß wu die iwwad Maddscheib vabreeide neddmol e Drehbuch! Waahre Imbrowisazioonskienschdla! Huud ab!
Kumme isch graad Daamemoode… Schdeehd do e Moddel – ohne zu iwwadreiwe – gschezzde Konfeggzionsgreeß 50, awwer die Brunztulbb fun Modderadoorin kindichd Greeß 40 o! Die Hoos hedd jo e Biiesenohd, die deed schdregge!
Alles klaa! Hummbugg hewwe dengd! – Awwer sauwer falsch gwiggld! En Kanaal weida schdeehd en Kerl, wu aa Mood an ‘d Fraa bringe will… Schbeedeschdns jetzat musch schnell end Kich niwwa renna un oi Bladd uff 5 schdelle, dasses Pobbkorn rechdzeidich ferdich isch, befoor der Kerl en sei Ellemend kummd! Weil jetzat werrds doann richdich unnahaldsaam! Der Kerrlich had neemlich so fiel Ohnung funn Moode wie en Reißfaschluss fum Krawaddebinne! Er schdrenggd sich zwaa o wie – awwer je meeh dassa fasuuchd zu ergleere dessdo meehna dudda sich selwa neireida! Un des isch en Ridd uff de Raasierkling!
Awwer ma mussem zu Guud halde, er had em Essessmend-Senda während seim Bewerbungsgschbreech sauwe uffghorchd! Weil, sei Souwaränidäd faliierda ned, eegaal, wie long die Bräsendazion gehd! Drozdem winsche ma doo liwwa da Drigeema-Aff zrigg un geh ens Bedd! Zugegewwenamaße had me niemond dazu gneedichd, denn Dregg zu gugge! Leida waare soo gfesseld vun dem Kerl seinere Modderazion, dasse noch en da Kich nachem Rechde gugge muss, weil `s Pobbkorn hewwe unner da Zeid gonz vagesse… Des faahd jetzat semdlich unner da Disch rum un ned en meinere Gosch! Awa zum Gligg hewwe joo em Schlofzimma aa en Fernseh un do mache se grad Weerbung for de neischde Deisn. En demm Sinn! Alla gud Nachd!

© Benny – de symbadische Kraichgauner

0 Kommentare

Einen Kommentar abschicken

Deine E-Mail-Adresse wird nicht veröffentlicht. Erforderliche Felder sind mit * markiert.