*Originalsatz von Humphrey Bogart im Kultfilm „Casablanca“ Als e neilich an eme graue Novemberdag im ausgschriewene Neibaugebiet im Gewann Engelfeld unnerwegs war, hot iwwer mir
e geflügelts Wese sei Runde zoge un isch dodebei immer diefer gfloge, bis’s direkt 10,12 Meter iwwer meim Kopf sein Platz
gfunne hot. S’isch praktisch gstanne in de Luft un hot sein Blick in mei Richtung eivisiert. Späteschtens jetzt war mer klar: en
Engel isch’s net – sondern en hungrige Sperber! Mir hen uns tatsächlich in d’Auge gugge kennt, zumindescht i in seine.
S’war zwar nahe(f)liegend un i häbb als Durchg’impfter un net Bauwilliger devo ausgeh kennt, dass er’s net uff mi abgseh hot, awwer in meinere umittelbare Umgebung muß er irgendebbes Essbars, z.B. e Maus odder e Aidechs erspäht hawwe. Baides gibt’s in dem Neibaugebiet, was bekanntlich de Baubeginn in dem Areal deitlich verzegert hot. Wenn ma uff em Rothaus sage dät, wer 2 G noochweist, därf baue, hätte mer garantiert von jetzt uff glei e paar Impfberaite meh im Flecke.
Mir isch bei dere Begegnung mit dem Raubvoggel uwillkürlich die Szene aus dem Kultfilm Casablanca eigfalle, wo de Rick in de deitsche Synchronisation zu de Elsa „Schau mir in die Augen, Kleines“ sagt. Zu de momentane Situation, wo der Sperber zu mer runnerguggt, dät de Originalsatz vom Humphrey Bogart besser basse: „Here’s looking at you, kid“ – Do hot grad oiner e Aug uff de, Birschle. Hot me des heimtückische Virus vielleicht a schon im Blickwinkel?!? Noch während e beim Sinniere bin, legt der gfiederte Kamerad sei Fliddich nach hinne un schießt kerzegrad uff me zu – des haißt net genau uff mi, vielmeh uff e Stell ca 3 Meter schräg vor mir – äwe in des eiladende Bauerwartungsland, krallt sich e Beutetier un fladdert mit em devo. Was’s genau war, hot ma net erkenne kennt, awwer wahrscheints war’s e ubedarfte Amsel odder e leichtsinnige Maus, die net demit grechent hot, dass d’Gefahr a von owwe lauert.
Uwillkürlich häwwe me an sellem Noochmiddag zwischedurch immer widdermol versichert, ob d’Luft um me rum un iwwer mir
A tatsächlich rein isch. Wer ugschützt uff freiem Feld unnerwegs isch, muß nämlich mit allem rechne…