Hasezähn un Zahnarzt- Hase   (e nachöschderliche Betrachtung)

Manche Sessel verspreche koine Gmütlichkeit. Der beim Zahndokter zum Beispiel kann noch so bequem gepolschtert sei: e Vergnüge erlebsch uff dem Möbel selte. Um so wichtiger isch’s Ambiente drum rum. Heut hen se dort sogar en Fernseh an die Deck getackert – zur Ablenkung. Weller Film dort laaft, kriegt awwer selte oiner mit, weil se alle vor Schmerz (odder aus Angscht vorem Schmerz) d’Auge zupfetze.

Wichtiger wie des Deckeprogramm isch fer mich, was für Bilder an de Wand hänge. So dass mer uff was Erbaulichs gugge kann, wenn mer do wie’s Lamm uff de Schlachtbank hoggt un uff de Bohrmoischder wartet. Vor unserm letschte Umzug war sell e Bohrmoischdere – un zwar oine mit eme eigewillige Kunschtverständnis. Im Wartezimmer e Collage mit de Scherbe von eme kaputtige Deller, in den grad en zackige Blitz neihaut. Sie, des Bild hat mir Schmerze verursacht! Zu sehe, wie de kupferfarwige Blitz uff des Porzellan trefft – autsch, des hat e spitzigs un giftigs Nerve-Echo im Eckzahn links owwe ausglöst. Do hasch de scho fascht nach de Wurzelspitzebehandlung gsehnt!

Im Behandlungszimmer selwer wars net viel besser. Do hasch vom Folterstuhl aus uff e große Schwarzweißfotografie geguggt: e Stückle Doodholz in ere Wüschte. Des kahle, ausgebloichte Holz hat arg an die ausgebloichte Knoche von eme Skelett erinnert. Vun dem Bild isch e derartige Endzeitstimmung ausgange, dass sofort de Prämolar rechts unne gegrummelt hat. Unser letschter Umzug hat me von dene Quale dann erlöst.

In de Praxis von meim jetzige Dentischt fallt oim vor allem s’Farbkonzept ins Aug: alles in Keenigsblau un Weiß. E bissle kühl un sachlich vielleicht, awwer gnau des strahlt Komptenz aus. Un gnau die brauche, wenn ich do mei orales Innelebe preisgeb.

Diesmol isch mei Zahnkontroll uff de Gründunnerschdag gfalle un des hat me ziemlich aus de Bahn gschmisse! Des vertraute Blau- Weiß in de Praxis war nämlich durch en dominante Goldton erweitert worre! Wie ich mei Kärtle üwwer de Anmeldetrese schieb, sitze do drei Goldhase von sellere bekannte Schweizer Schoklaadfabrik. „Schoklaad beim Zahndokter?!!!“ patzt’s aus meinere Klapper naus, noch bevor e me bremse kann. „Ja“, moint die Dame hinnerm Schalder, “gugge se sich um, do gebts noch mee!“ Un tatsächlich, in dere ganze Anmeldung wimmelts von Goldhase: in de Glasvitrin newwerm Unnerkiefermodell, uffem Schrank mit de Patienteakte – üwweral hogge se in Dreiergrüpplen: kloine, middlere un große. Wer die wohl kriegt? Die große Hase vielleicht die, wu ihre Zähn ordentlich gebutzt hen, die mittlere sen für die, wu nur de Zahnstoi bloogt un die kloine für die mit Karies? Odder vielleicht gnau umgekehrt? Weil so en Zahndokter, der will au lewe un wenn alle e perfekte Klapper hen, brauche se koin Dokter mee! Isch des Ganze am End e perfide Patienteaquise??? Gebts do vielleicht finschdere Macheschafte mit eme Schweizer Schoklaadhersteller? Am End e Großkundeabo zu Sonderkonditione? Do kriegt des hoppelnde Fruchtbarkoitssymbol in Gold – quasi in Zahngold – uff oimol e ganz annere Bedeutung! S’braucht net viel Fandasie, was sich do vermehre soll!

Zu weitere Üwwerlegunge komme nimmee, weil ich uffgrufe werd. Mein Zahndokter isch en nedder Mann. Un er isch so eifühlsam, wie’s mit seine ergebnisorienddierde berufliche Handlunge halt vereinbar isch. Un wie ich fer diesmol unbschadet vom Stuhl runnerkrabbel, fass e mer e Herz un sprech en uff sei saisonale Deko an. Ob des net regelrecht e Generalkariesattacke sei?! Er widdersprecht mer ganz entschiede: „Wenn ordentlich die Zähn gwienert werre, dann bassiert do gar nix! Nachhaltig seie die Hase bei guter Zahnpfleg lediglich fer d’Hüfte!“ E Nachhaltigkoit, die mir erspart gebliewwe isch – e Goldhäsle zum Abschied hewwe nämlich koins kriegt, obwohl er üwwerhaupt net gebohrt hat!

Ich hebs de Annegret verzählt und sinniert, was sich de Zahndokter bei dere Deko wohl gedenkt hat. Selle hats naddierlich widder sofort uff de Punkt gebrocht: „Ich woiß gar net, was du hasch? Des isch doch so klar wie Kloßbrüh: Hase hawwe Hasezähn – un die zwoi lange Frontschaufelzähn müsse kerngsund sei, wenn die Mümmelmänner ihre Geelrüwe knabbere wolle! Ha, e besseres Sinnbild fer Zahngsundhoit gebts doch gar net!“ Wie moischdens hat se widder recht. Do kanne jetzt noch e Weile dra knabbere!