Gute Nochrichte?

Zeitungsleser hens net leicht! Do koch‘sch dir morgens gut glaunt e scheens Tässle Kaffee un schmiersch e Löffele Honig uffs Brot. Un dann holsch des Drecks- Blättle rei – un prompt hasch des ganze Elend von de Welt newwem Frühstück liege. Ja, gute Abbedid!

Uff de erschte Seit nur Krieg un Krise. Ich tricks me als selwer aus, un fang von hinne an zu lese. Awwer Dodesanzoige, Schlechtwettervorhersag un verlorene Fußballspiele baue au net grad uff. Also doch widder nach vorne gebläddert. Un do uff Seite 6 , ganz owwe rechts – do finne se endlich, die gsuchte Rubrik: „Die gute Nachricht!“ Komprimiert uff siewe mol zehn Zendimeter nur Posidives! Mer glaabts net: s’bassiere tatsächlich noch Sache, die oim Hoffnung mache, die oim uffbaue un e gutes Gfühl vermittle! Un des fascht jeden Dag!

So wie am Dienschtag. Do hats en Waschbär gschafft, von selwer widder von dem Baam runnerzukraddle, uff dem er sich verstiege hat! Des muss mer sich mol vorstelle!

Un dann war do noch die Nochricht von de Henni. Ach, was hat me des g‘freut, dass die Henriette sich endlich ihrn große Traum erfüllt hat! Sie hat jo noch net viel gsehe von de Welt – awwer heut hat se sich endlich getraut, zu verreise. Von Münche aus in die große weite Welt. Wo se hinwollt, hat se net verrote. Vielleicht zum Fasching nach Köln? Odder zum Familietreffe beim Hühner- Hahnefeschd in Gackersdorf? Mutig wie se isch, hat se sich ganz elloi zum Bahnhof uffgmacht. Dass se ihrn Zug dann awwer doch net erwischt hat, kann mer in dem Fall net de Bahn mit ihrer chronische Unpünktlichkoit anlaschte. Schuld ware hilfreiche Zeitgenosse, die des Huhn Henriette in de Bahnhofshall uffgegriffe un dann im Fundbüro abgewwe hen. Statt de große Fahrt isch’s für d’Henriette dann halt nur e Ausflügle ins Tierheim worre.

Awwer Leut, des macht doch Mut! Oifach emol uffbreche, alles zurücklasse un dann de Nas (odder em Schnawwel) noch ins Abenteuer! Wenn des e dummes Huhn kann – dann kann des doch jeder! Un noch e annere Botschaft steckt in dere Gschicht – un die kannsch von de Hühner lerne: nämlich oifach emol e bissle mee Vertraue in die Deutsche Bahn! Alles werd gut!