Ich kann se nimmeh höre, die gude Ratschläg: Du musch immer positiv denke, reiß de zamme, Du musch Geduld habbe, ’s gibt Schlimmeres, Du lebsch noch, Du bisch doch immer fröhlich, kannsch noch lache, bei dem, was alles hinnerder hasch. Bleib tapfer, Du machsch des scho unsoweider unsoweider.
Nei, mer kann net immer positiv denke, mer muss a zulasse, dasses eim manchmol bschisse geht. Zammereiße? Do musse jetz lache, Du kannsch nur was ausenanner un net zammereiße. Geduld? Des isch mein zweiter Vorname. ’s gibt Schlimmeres, nadürlich gibt’s des, abber in dem Moment, wo mers so dreckich geht, isch des schlimm un dann derfe a mol Rotz un Wasser heule. Ha du lebsch jo noch, ruft eine ins Telefon. Ja sonscht wäre jo net am Telefon, wenne dot wär. (Gottseidank habbe mein schwarze Humor no net verlore). Ja ich mag abber net immer fröhlich sei, alle uffbaue, tralala un hoppsassa mache, nei, ich will a mol sage, mir geht’s schlecht un ich kann net immer tapfer sei.
Un dann ruft e ganz alde Freundin a, frogt, wie mer’s geht, ich sag‘ nach denne viele gude Ratschläg zurer: Intressiert’s de wirklich wie mer’s geht? Bitte kei gude Ratschläg meh! Un dann sagtse – un des höre an de Stimm‘, die ganz ruhig un ehrlich klingt: Du dusch mir so leid!
Das hat doch auch mal gut getan!
Ja, ’s isch so, Du geduldiche Judith…eigendlich isch‘ s nie zu schbäd , sich als Kind zu fiehle (vielleicht erschtrecht un ganz bsunners im Alder !?), sich ab un zu a emol dreeschde un behandle zu losse wie so oans un denooch zu regischdriere, dass dess gut geduh hot… odder ? !