En knallich heiße Summerdäg

Sollt mer s´ Esse de Situation orbasse.

Nix mit koche dehorm. Koi Spätzle, Schnitzl un Soß.

Oder Eierkuche mit Spinat. Oder gar Dompfnudle mit Grumbeeresupp.

S´ isch oifach viel zu heiß for so ebbes.

Ab em Sunndag gibt’s also als praktisch-alternatives Heißwetter-Esse:

Worschtsalat mit Grumbeeresalat un Brout.

Mondags gibt’s des gleiche nochemol, weil ebbes iwwerich war.

Fascht schmeckt der do noch e bissl besser wie em erschte Dag.

Weil de Worschtsalat nohd erscht so richtich schee durchgezoche isch.

Em Dienschdag – s´hot sowieso immer noch mehr wie 35 Grad –

Gibt´s de Rescht vum reschtliche Worschsalat

Zomme mit dem letztschte Rescht vum Grumbeeresalat. Uhne Brout.

Em Mittwoch werd e neie grouße Schüssl Worschtsalat gmacht.

Dezu Grumbeeresalat – frisch eigekaaft – un frischs Brout.

Dunnerschdag: Grumeeresalat mit Brout un Worschtsalat.

Em Freidag: Brout mit Grumbeeresalat (Rescht) un Worschtsalat (Rescht).

Somstags un Sunndags: S´gleiche widder, mit frischem Worschtsalat.

Was willsch en derre Bruthitz ä onners esse?

Ebbes warms vielleicht? Her uf, do lieft der doch noch mehner die Brieh.

Mondags: Blut nemme bei de Routine-Blutkontroll beim Hausarzt.

Dienschdags: En Oruf vum Doktor.

Moi Choleschterin wär uglaublich hoch, segt der.

Un korz vorere Gicht wäri a noch.

Ob ich vielleicht wüsst, wu des herkummt?

Sag mol, isch der de Doktor – oder ich?!

Wuher sollen ich des wisse?!