Gruslkabinett

 S’Wartezimmer beim Dokter hoggt voller Läddierte: e kloine Grodd mit ere verbunnene Hand, en Kerle wu sich de Bauch hebt un e grünbloichkeesigs Gsicht hat; e Schulmädle, des kaum unner seim dicke Verband vorschiele kann un allfort jammert, weil de Kopf so mordsmeeßig weh dut; un dann noch e Fraa, die e Gschirrdiechel um de Unnerarm gebunne hat, aus dem s’Blut nur so tropft.

Ich setz me zwische des geballte Elend uff de letschte freie Stuhl un denk, dass des wohl e Weile dauere werd. Koi fünf Minudde druff ruft die Sprechstundehilf: „De Nächschte bitte!“ Un so schnell kannsch net gugge, wie oiner nach em annere im Sprechzimmer verschwindt: die kloi Grodd, de Kerle, des Schulmädle un zum Schluss die Fraa. Selle dreht sich unner de Dür noch emol um, un frogt den Mann in de Eck gegenüwwer: „Willsch du net mit rei?“ Awwer der schüddelt nur stumm de Kopf.

Jetzt hogge nur noch mir zwoi in dem Wartezimmer. „G’höre die alle zu ihne?“, kanne mer net verkneife zu froge. „Ja!“, moint der mit eme abgrunddiefe Seifzer. „Unser Kloinschte hat Kaschdaniemännlen gebaschtelt. Für d’Fießlen wollt se, oigesinnig wie se isch, die angschpitzte Streichhölzlen selwer in die Kaschdanie neidrücke – am End hat se sichs middel durch d’Hand gedrückt. Wie ichs widder rausgezowwelt heb, hat s’Blut nur so gspritzt. De Bu hat heimlich noch emol von dere Supp gesse – die mit dene Pilz, die mer vorgeschtern in de Pfalz gsammelt hen. Jetzt hat er sich de Mage verrenkt. Unser Große hat unbedingt vorhin, bei dem stürmische Sauwedder, ihrn Drache steige lasse müsse. Der isch ere dann so jesusmeeßig uff de Kopf geknallt, dass se mit ere diefe Platzwund hoimkomme isch – un ich kann doch koi Blut sehe. Mei Fraa war grad debei für des dabbet Halloween en Kürbis auszuhöhle. Wie se unser Dochter gsehe hat, isch ere vor lauter Schreck s’Messer ausgrutscht un voll im Unnerarm glandet, so dass noch mee Blut gflosse isch. De Herbscht isch halt e gfährliche Zeit!“

Voller Mitgfühl frog ich den gebloogte Familievadder: „Awwer ihne selwer geht’s soweit gut?“ Er wiegt de Kopf her un na: „Des kann mer so net sage. Ich heb halt widder mei Herbschtdepression, wie jeds Johr um die Zeit.“ Do fallt mer jetzt au koi Antwort mee ei. Un ich denk im Stille: do brauchsch dir vor Halloween koin Horrorfilm im Fernseh neiziehe. Do hoggsch de oifach mol zum Dokter un wartsch uff die Grippeimpfung – s’reinschte Gruslkabinett!