Grüßauguschtine
Sie grüße nimmee! Was isch los mit de Leut? Do kommsch nach fünf Woche widder hoim un nix isch mee wie’s war! S’neue Scharnierle will bewegt werre, un so mache me frohgemut mit meine Krügge uff de Weg – un dann des: koin Mensch grüßt mee! Leicht bedröppelt humple de Weg widder zrück un frog me, was in fünf Woche so Schlimms bassiert sei kann, dass alle nur vor sich na muffle? Herrschaft noch emol, mir sen e Dorf un im Dorf werd gegrüßt! So war des scho immer, un so soll des au bleiwe! Ich beschließ, dere Sach uff de Grund zu gehe.
Daag oins: Problemanalys Ich dreh mei Runde un gugg mir des emol gnauer a: des stimmt net, dass koiner mee grüßt. Die Jugendliche odder d’Schulkinner flitze an oim vorbei un mit em Fahrtwind wehts oim e „Moggää!“ odder e „Hallo“ ans Ohr. Die junge Mamas mit ihre Kinnerschääse nicke oim au zu – sofern se de Blick vum Handy losreiße könne. Noi, s’Problem sen die Äldere un die Alde, die bleiwe stumm. Des kann doch jetzt net sei, dass die uff oimol alle so schlecht höre odder sehe, dass se net mitkriege, wenn do jemand an ene vorbei laaft?
Daag zwoi: Selbschterkenntnis „Ja, dusch du se grüße?“ hat de Gatte kriddisch gfrogt, un des war e gute Frog! Beim nächschte Rundgang heb ich me also selwer beobachet, wie ich des mach. Ganz klar: ich such de Blickkontakt, un wenn der erwiddert werd, grüß ich. So, un do semmer scho beim Kern vun dere Sach! Des isch nämlich in erschter Linie koi Grüßproblem sonnern e Herguggproblem. So wie die Fraa, die mer grad uffem Fahrrad entgege kommt un die de Blick koin Millimeter vun de Lenkstang hebt. Grad als ob ich Luft wär! Ich geh in meiner Selbschtbeobachdung so weit, dass e me frog: wolle die oifach mich net agugge? Am End sens d’Krügge un sie wolle oifach des Elend net sehe?
Daag drei: Problemlösungsschdradegie Vor meim Rundgang stell ich die Krügge ins Eck. Ich schnapp mei Walkingstegge, beiß die Zähn zsamme un mach oine uff junges Reh (okay, noch e bissle waidwund). Awwer de wache Blick offensiv in alles gebohrt, was mer entgege kommt. S’erschte Opfer isch die mit ihrm Fahrrad – un was macht die Gruuschdl? Schmeißt de Kopf nach rechts, dass d’Halswirwel knirsche un dud so, als gäbs do wer woiß was zu bestaune. Do isch awwer nur em Nochber sei Kirschlorbeerhegg
Daag vier: Schdradegievariation Ich beschließ e hemmungslose Grüßoffensive. Jeder wo mer begegent, kriegt en gnadelos fröhliche Gruß entgegegschmettert. Do, do vorne kommt widder die Gruuschdl uff ihrm Fahrrad! Ich setz e scheens Gsichtle uff un ruf lauthals „ Gude Moorgä!“ Die reißt vor Schreck de Lenker rum, dass se schier vum Fahrrad fliegt, schießt en giftige Blick uff me ab un drebbelt weiter. Oin Versuch noch! Do hinne – der mit seim Hund! Vielleicht war mein Morgegruß e bissle zu laut: diesmol ischs de Hund, wo verschreggt un uffgregt sei Leine dreimol um d’Fieß vun seim Herrle wickelt. Bis die zwoi sich widder ausenanner sorddiert hen, binne scho außerhalb von de Gegegrußzone.
Daag fünf: Resignation Ich fahr mei Grußenergielevel widder runner. Irgendwie werd des nix un ich heb koi Luscht allfort de Grüßauguscht zu gewwe – odder besser d’Grüßauguschtine. Lasse mers wie’s isch un oin Vorddoil hats: sollt unser Dorf jemols d’Stadtrechte kriege, bewegt sich zumindescht s’Grußverhalte scho uff Großstadtniveau!
Liewi Grüßirmtraud,
d‘ alde Leit kenne de vielleicht bloß ohne Krügge un wisse uff d‘
Schnelle net, wi’se uff’de reagiere solle
Sin wumeeglich „baff“ iwwer oine, wu mit Krügge rumhumpld un trotzdem gut druff isch… (?)
Do hosch du doch gfälligschd e Klagemien‘ uffzusetze !
So flexibl isch ma halt im Alder nimmeh !
Odder ’s isch halt doch so, dass ma grad im Alder ’s Elend nimmeh seh will
un sich liewer an sei’m Lenker feschthebt ! (?)
Wenn de Mensch so ebbes wie Krankehaus erlebt hot, dann bleibt oifach was an oim henge. Des isch als schun ohne Krankhaid so.Un des Gsicht gebt hald nooch, do kansch blos langsam ebbes degege mache. Awwer de Mensch isch en Wald, wos raus schallt wie mer nei schallt. Mer muss sich selber widder uf Vordermann bringe. Die kloine Schildle in de Apothek un sunscht „heute schon gelächelt?“ sin en wichdicher Ofang. In de Sechzicher war in de Induschdrie mol die Parole, an de Treppeufgäng große Schbiggel ozubringe, dass sich jeder immer widder seht un was mache ko, wann er sich net rechd gfalld. Immer wieder Blickkontakt isch wichtich, des Hern schätzt sein Gegeniwwer in Bruchtaile vun Sekunde ei un reagiert. Also oifach immer Blickkontakt suche un sein Gegeniwwer ohlächle. Es helft uf Dauer.
Wens dauernd machsch, dann wird dei Gsichdl grad annerschderrum als wie bei de Angela.
Kannsch der awwer aa merge, was de Sou-Chong im Land des Lächelns singt:
„immer nur lächeln und immer vergnügt, Immer zufrieden, wie’s immer sich fügt, Lächeln trotz Weh und tausend Schmerzen, Doch wie’s da drin aussieht, geht niemand was an“ (zit. n. Denscher 2017, 411).
Dann no was, was du ogschbroche hosch: Sin deine Unnerarmstitzen in der richdiche Höhe? Du musch demit ufrecht gehe, do derfst du koin Buckel machen.
Des mit dem Blickkontakt heb ii frieher selwer ausprobiert. Die Ohglächelte henn maischdens zrickglächelt und manchmal aa noch grießt. (Do ware awwer noch net so viele handykrank, derfsch du net vergesse).
Denk mol driwwer nooch,
moint Otto