Geburtstag von Nelson Mandela (18.Juli)

Mir hen des seltne Glick in unserm Lewe,
dass mir e faschd gude Demokratie erlewe.
Die wird dorch Korrubde un Lobbyischde zwar geschdehrd,
awwer bis jetz hod se sich ganz gud  bewährd..

Vorher wars bei uns aa annerschd als wie in de USA.
Do hing koi  Sklavewertschaft dra,
wo mer hed bekämpfe misse, mir hen anschdadd
dem meh polidisch un sozial vermasseld ghad

Am „Kap der guten Hoffnung“ ware erschd mol Seeleit gschdrandt.
Un dann kame holändische, belgische un franzessische Bure ins Land.
Die Weisse hen iwwer die Schwarze ganz radikal un uscheniert
im afrikanische Schdaad mid Rassedrennungsgesetze regiert.

Nadierlich, wie kanns aa annerschd sei,
mischde sich do die Bridde ei.
Se machde zerschd e Kolonie do draus,
un dann e Dominium fers Kenigshaus.

Die Aparthaid mit de Trennung vun de Rasse war schlechd.
Die Schwarze fande den Kampf degege gerecht.
De Nelson Mandela hod sei Lewe rikiert
un polidisch wider die Apartheit agierd.

Siwenezwanzich Johr hen sen ins Gfängnis geschberrd.
Mid seim Kampf gege d Apartheit had er net ufgehehrd
Un s neie afrikanische Parlamend
wählt ihn zum erschde schwarze Präsident.

Fer den Kampf um Freihaid un Versöhnung
gabs den Friedensnobelpreis dann als Krönung,
un vun de UN als  ganz bsonnere Ridderschlag
gabs dann de internazionale „Nelson-Mandela-Tag“.

OA0721

Auch mit einer Umarmung kann man einen politischen Gegner handlungsunfähig machen.
Nelson Rolihlahla Mandela
Staatsoberhaupt, Staatspräsident der Republik Südafrika von 1994 – 1999, Amtssitz: Private Bag X83, Kapstadt, Ikone des Widerstandes gegen das Apartheid-Regime, von 1962 – 11. 2. 1990 im Gefängnis, Friedens-Nobelpreis/1993 (Südafrika, 1918 – 2013).